Berdad ta berdad 2008

Skirbi pa Jenny Cratz

Un Pueblo na guera cu su mes!

E momento cu autoridad a dicidi di laga Hendrik bay Anthartica, mi a hala rosea. No pasobra mi tabata di acuerdo cu loke a pasa. Pero mi a mira mi dilanti, un Aruba destrui. Un Aruba, caminda esun cu mester dirigi e barco como capitan, ta habri caminda pa revolucion. Un Ministro Presidente tabata menaza su propio pais. Sabiendo cu Husticia no mester di Ministerio Publico, cu si e no actua manera e mester actua, lo pasa verguenza di siglo, ora e proceso hudicial sigui, mi a prefera pa na e momento trankilidad bolbe na Aruba, despues cu porta a worde habri pa Arubianonan destrui Arubianonan.

Awe atrobe Aruba ta den suspenso. Momentonan cu Aruba mester uni pa por enfrenta tanto problema, atrobe Aruba ta den problema. Mi no kier a drenta e polemica aki. Pero ambtenaarnan tin derecho di pidi pa aumenta nan sueldo? Tur ambtenaar ta gana sumanan grandi? For di momento cu Gobierno tabata tuma e hendenan aki den servicio pa haya nan voto den hopi caso, e no tabata sa cu ta hende el a tuma den servicio? Maestronan, cu mester para dilanti cas, prepara les pa muchanan, por haci esaki efectivamente si nan cabez ta yen di e hipoteca cu nan mester paga riba nan cas, con nan ta haci paga nan auto?

Awor envez di un solucion worde busca, hendenan cu pa basta tempo nos ta puntra unda nan ta keda pa defende bienestar di Aruba, ta dicidi di hiba e empleadonan di Gobierno Huez.

Na promer lugar mi kier bisa tur esnan cu ta worde ciega door di fanatismo, si awor nan ta mira kico ta kico y kende ta kende. Pakico ATIA tur e temponan aki, nunca a habri su boca pa defende interes di e comerciantenan, cu ta den problema serio? Unda ATIA y AHATA tabata un aņa y tres luna largo, cu BBO y cantidad di medida den forma di aumento di prijs, tabata afecta comercio y trahadornan? Nan a papia? Kico ta pasa cu turismo? Pueblo sa? AHATA ta mustra con calidad di turismo a baha y reclamonan di turistanan cu ta mira Aruba bay atras?

Awor AHATA y ATIA ta tuma e bastuta di guera di Gobierno, pa bay confronta trahadornan di Gobierno, sabiendo cu nan propio trahadornan ta den desesperacion y en espera di e momento cu nan tambe por lanta para pa grita cu ta basta!

Si mi djis mira ultimo aņa, mi ta yega na un conclusion. Gobierno a pasa BBO y pa sconde loke el a haci cu Aruba, a bay sconde tras di doņonan di tienda y supermercadonan. Cuido medico ta un desaster y pa baha su calidad mas, Gobierno a lanza un guera contra docternan, desprestigia nan den vista di pueblo.

Division y mas division ta worde crea na Aruba y awor mi ta puntra: pakico? Pasobra cu tin cosnan grandi pa sconde! Cortina di huma tras di otro a worde fabrica pa Gobierno, cu ta usa hende sea pa persigui nan y destrui nan of pa haci nan mas capitalista si ta trata di hende corupto, sin principio, cu ta manera avion cu ta lanta vuelo dependiente di e direccion di biento.

E momento a yega pa Aruba realiza den ki trampa e ta cay. Aruba ta un pais liber. Tur hende tin e pleno derecho di sigui e partido cu nan kier. Pero na mes momento, como ciudadano cu kier bienestar di e pais, cada persona cu ta forma parti di un partido, mester corigie ora e ta mira cu loke e ta haci no ta bon.

Awe Aruba ta depende di MEPistanan mes pa splica Gobierno cu loke ta pasa ta contra interes di Aruba y cu nan mester cambia nan rumbo. MEPistanan tin den nan man pa bisa e actual gobernantenan cu awor Aruba mester di hende cu por restablece paz y trankilidad na Aruba y no hende cu ta crea un situacion, cu hasta ora a registra temblor antayera, ainda pueblo tabata tin mas atencion pa loke ta pasa na Aruba.

ATIA y AHATA envez di hiba e sindicatonan Huez, mester a asumi posicion di lider di un grupo importante na Aruba y busca apertura pa solucion di e situacion actual na un forma pacifico, no na un forma di haci e problema mas grandi.

Gobierno ta sconde cosnan grandi den e cortina di huma cu el a crea, despues cu el a perde su cortina di huma di tanto aņa, Fondo Nobo, cu a permitie destrui Aruba. Loke mester keda scondi ta asina grandi, cu ni e peligro cu ta worde crea pa e pais y su ciudadanonan, no ta importante. Hasta por conclui cu Gobierno mes cu su actitud kier un golpe di estado; un confrontacion di hende contra otro. Algo nunca visto na un pais, cu no ta biba bao dictadura.

Gobierno a yega na un punto cu e mes ta realiza cu e pais aki no ta gobernabel mas, sigur cu nan na mando y ta busca un forma pa por sali pa porta patras? Pakico Gobierno kier un pueblo na guera cu su mes y pakico instancianan cu mester defende interes di e pais, ta parce di a bende nan mes cu un solo accion cu tin tanto tempo ta tuma lugar: fomenta violencia, agresion, cu ta e culminacion di rabia, rencor, frustracion, angustia, cu ta worde sembra,

Mi kier pidi Arubianonan y tur cu ta stima e pais Aruba pa keda calmo. Pa no bira participe di algo, cu no ta na interes di Aruba. No cay den e trampa cu ta worde crea y cu lo tin un solo resultado: e destruccion final di e pais Aruba, dushi tera!

Back