Analisis politico

 MARISOL TA SACA RABIA RIBA NEL Y RUDY

ORANJESTAD (AAN): Tur sinti di berguenza a bay perdi den e partido MEP y muy en particular di e ministronan. Awo nos por tuma nota cu Marisol Lopez ta mustra dede ariba Rudy Croes cu e a duna Mar Azul e permiso pa ocupa henter un caya y cu esaki ta incorecto.

   Marisol a worde acusa poco tempo pasa cu un di su inversionistanan a haya un cantidad di tereno como recompensa pa su contribucionnan den campaña. Un di e fabornan cu Marisol a haci un di su inversionistanan tabata e pier di e piscadornan di pabao y esaki a bira un scandal grandi cu a pone Rudy y Nel saca nan curpa for di e corupcion aki y laga Marisol carga tur e peso su so. Te awe!

   Pero awo aparentemente Marisol a mira su chance pa dal back y a mustra cu Huez a dicta contra e decision di Rudy y Nel pa duna Mar Azul henter un caya. Scandaloso cu Aruba a zink di e diep ey cu e discusion den prensa ta cu un ministro ta mustra dede ariba e corupcion di su colega ministro. Ta unda e sinti di henter nos comunidad a keda. Con por ta posibel cu e ministronan ta mustra tur dia cuanto corupcion tin andando entre nan y tur e institutonan cu tin e tarea di haci algo ta bira cara y haci manera nan no ta mira nada.

   E ministronan mes den publicidad ta acusa otro di corupcion na gran escala y nada ta sosode. Hopi biaha a worde treci padilanti cu ta asina facil pa mustra e coneccion causal entre e inversionistanan cu a pone placa bruto den campaña di e ministronan y tambe ta facil pa mira con placa grandi a worde paga pa e ministronan directo den campaña.

   No ta nada dificil pa mustra cu e ministronan a worde cumpra pa duna back un cantidad di propiedadnan di pueblo. Di Algemene Rekenkamer cu por a investiga un cantidad di asuntonan criminal cu ta parti den ley di nan tarea no a haci nada ariba e tereno aki. E secretaris di Algemene Rekenkamer te dia 31 di december di 2007 a keda traha duro pa mira con e por a gara e ex ministronan den e caso di Fondo pero su wowonan ta completamente sera ora ta trata di bandidez di e ministronan di MEP.

   Den un analisis politico algun dia pasa nos a trece padilanti cu e  momento mester yega cu ta e secretario aki mes mester worde investiga pa mira si e no ta castigabel pa loke el a haci cu e cifranan di Fondo di Desaroyo pa trata di laga su contrincantenan politico haya castigo. No tin duda den mente di cualkier persona ora mira kico a sosode den ultimo campaña y e cantidad di tereno cu a worde duna na e inversionistanan cu tin criminalidad di marca mayor den tur esaki.

   Tambe nos a trece padilanti cu un di e otro instancianan cu mester investiga a fondo kico a tuma luga ora nan mira cuanto tereno a worde duna na e inversionistanan y cuanto nan a duna e ministronan pa haya e terenonan aki. Ministerio publico ta ciego den tur esaki. E ehempel di con ciego nan ta no solamente ta e caso di Marisol y Rudy pero por a worde biba di cerca ora cu Booshi mester a aparece dilanti di Huez y e fiscal a pida Huez pa laga Booshi liber y no tuma loke ministerio publico a bisa un paar di aña pasa na serio.

   E fiscal mes con ridiculo e por zona a pidi Huez pa declara ministerio publico “niet ontvankelijk” den e caso di Booshi. E Huez cu a mira e wega politico di e fiscal a para e fiscal aki brutamtente y a bisa cu ningun momento e ta bay di acuerdo cu e fiscal pa no persegui Booshi y e Huez a dicidi contra deseo di e fiscal pa castiga Booshi cu un castigo di 500 Florin.

   Tambe nos por a mira e fanatismo ciego di e mesun fiscal aki ora cu Hendrik Croes a haya su mes den un “hit and run” y e fiscal aki a trata Hendrik Croes cu handschoen di felpa. Ministerio publico tambe ta mira y tende con e ministronan mes ta acusa otro abiertamente di corupcion pero nan ta haci como si fuera cu nan sa di nada. Ademas loke ta haci e situacion aki pio ta cu parti grandi di nos comunidad cu normalmente a lanta para y protesta fuertemente contra tur e bagamunderianan cu ta andando ata kedando keto. Un apatia total cu ta tumando formanan spantoso ta loke ta haci e situacion di nos pais asina peligroso.

Back