PROME  TOCANTE “INFORMATION GOVERNANCE” PRESENTA PA CARIFIG

Hunto cu “Information Managing Day” presenta pa  ProDocIT. 

ORANJESTAD (AAN): CARIFIG y ProDocIT ta uni pa organiza dos dia di  tocante “Information Governace” y “Information Managing ” cu ta tuma lugar dia 8 y 9 di mei proximo den aula di Banco Central di Antiyas, na Curaçao.

   E conferencia aki ta di sumo importancia pa mundo empresarial y gubernamental cu ta haya oportunidad pa sera conoci y haya mas informacion con pa atende cu e concepto moderno di maneho di informacion, asina yama “Information Governance”.

  Informacion ta centro di tur loke un cu ta haci, manera; maneho strategico, investigacion y otro desaroyo. Informacion mester ta cla, transparente y confiable. Informacion ta un recurso cu mesun valor cu entre otro recurso humano y recurso financiero. Informacion mester ta accesible y disponibel na tur momento pa tur hende cu tin autorizacion na dje.

   E manera cu un organizacion ta maneha su informacion y su documentonan por afecta su abilidad pa competi, cumpli cu reglanan, recupera despues di un desastre, cu otro palabra, pa opera efectivamente. Companianan mundial cu a faya den nan maneho di informacion, manera p.e. Enron, Ahold, KPN Quest, Worldcom a mustra cu esaki por ta devastador. Cada compania mester maneha su informacion segun un metodo disciplina pa minimaliza riesgo of fracaso.

E conferencia aki ta atende topiconan cu ta yuda pa controla maneho di informacion.

   ProDocIT (Professional Document Management by Information Technology) ta un compania cu ta provee conseho y training den solucionnan automatiza den e.o. maneho di informacion. ProDocIT for di aña 2003 a bin ta organiza anualmente un tayer tocante maneho di informacion.

Celebrando e aña aki su  prome lustro organizando e tayer, ProDocIT a uni forza cu  CARIFIG: “Caribbean  Foundation for Information Governance” pa organiza un conferencia di 2 dia tocante e tema aki cu oradornan di renombre.

   E conferencia ta cuminza diahuebs 8 di mei merdia cu un “CEO Lunch” pa directornan y mandatarionan cu ta interesa pa tende kico e concepto di “Information Governance” por nifica pa nan compania, gobierno of otro organizacion.

  Orador di orden durante e almuerzo aki ta Prof. Dr. Ir. Rik Maes di Universidad di Amsterdam. Profesor Maes ta un eminente experto riba  tereno di maneho di informacion y comunicacion. E ta tambe tata spiritual y decano di e facultad “Executive Master in Information Management (eMIM)”.  Profesor Maes lo presenta su punto di bista tocante maneho di informacion na gremio gerencial, na ingles.

  Despues di almuerzo ta sigui un sesion di informacion cu 3 orador y na final un sesion plenario cu un panel di discusion. E presentacion- y discusionnan den panel ta tuma luga na ingles. Pa Diabierna 9 di mei henter dia tin e tayer anual di “Information Managing Day” cu diferente orador. Celebrando su prome lustro “Information Managing Day” tin como tema central: unda nos tabata 5 aña pasa unda nos ta awor y unda maneho di informacion ta hiba nos den futuro. Idioma vehiculo pa “Information Managing Day” ta Hulandes.

   Durante e 2 dianan di conferencia, participantenan tin oportunidad pa bishita varios mesa di exposicion di diferente compania di Curaçao y internacional cu ta presenta nan productonan y/of servicio cu ta sostene e concepto di maneho di informacion.

   Pa mas informacion y formulario di inscripcion pa e conferencia di “Information Governance” y "Information Managing Day” di 8 y 9 di mei proximo, por bishita website  www.carifig.com.

Back