Den 24 ora so!

CASONAN CONFIRMA DI SWINE FLU A SUBI NA DIESTRES! 

ORANJESTAD (AAN) – Ayera mainta, Departamento di Salubridad Publico a tene un conferencia di prensa pa duna informacion nobo tocante e situacion di e virus “Influencia AH1N1”.’

Director di Salubridad Publico dr. Trever van Gellecum a hiba palabra. El a bisa cu diahuebs, despues cu nan a tene un conferencia di prensa un ora despues nan a haya confirmacion di mas caso. Esey kiermen cu na Aruba tin seis caso nobo y cu den total tin 13 caso confirma.

Dr. van Gellecum a duna di conoce cu un di e seis casonan aki ta relaciona cu e siete casonan prome y e otronan cinco mester worde investiga ainda cu cual contact nan ta relaciona y por ta cu nan no ta relaciona cu e siete casonan confirma prome.

Podise cu ta un brote nobo cu a drenta Aruba y esey ta nifica cu mas y mas un y tur mester zorg pa cumpli cu e protocol di higiene, cu ta zona hopi simple y asina simple nos mester hacie y no busca manera pa hacie dificil.

“Zorg pa no tosa ni nister den ningun hende su cara, zorg pa laba man frecuentemente y percura pa bo sistema inmunologico ta bon.

Pues, zorg pa bo come saludable, evita si bo ta malo pa cana den gruponan grandi, no bay den areanan cu tin hopi hende, pues, evita pa plama e virus entre otro personanan”, dr. van Gellecum a remarca.

Dr. van Gellecum a subraya cu te awor e sintomanan ta mescos cu cualkier otro griep regular y esey ta nifica cu ta dificil pa constata si ta un influenza AH1N1. Pues, cualkier persona cu tin sintomanan di griep pa tene cuenta cu e protocol di higiene.

“E control cu nos ta haciendo awor nos tin cu cambie un tiki pasobra di e informacion nobo cu nos a ricibi e diagnostico ta keda funcional pa esnan cu mester di asistencia. Por fabor traha tempo pa bin busca bo vacuna.

Ponemento di vacuna ta bayendo bon, tog nos ta kere cu nos procesa un tiki mas cu nos ta haciendo na e momento aki, aunke nos ta nota cu tin hopi hende cu ya caba ta biniendo den direccion di e dos areanan cu por haya vacuna. Esaki ta na Centro Medico San Nicolas y na Salubridad Publico tras di nos edificio”, dr. van Gellecum a informa.

Back