O.P.P.A. CU BUSTRIP Y CU REUNION GENERAL

ORANJESTAD (AAN): E organizacion di Pensionadonan Publico Arubano, (OPPA), ta invita iembronan riba un bustrip rond di nos dushi pais Aruba. E bustrip of bustour aki lo bay den bus grandi y moderno cu airco. Lo bay bishita algun lugar di naturalesa y tambe lo core rond di Aruba y lo pasa banda di e proyectonan nobo banda di beach.

   Despues lo bay bishita e tan conocido ‘Paseo Herencia’. Na  Paseo Herencia lo bay tuma un lunch na e famoso restaurant ‘T.G.I. Friday’. E fecha di e bustrip aki ta Diahuebs, 10 april 2008.

   E salida lo ta pa 9:00 ‘or di mainta riba e Parkeerplaats di Busstation p’abao di Aruba Trading na Playa. Carchinan pa e bustour di OPPA aki ta obtenibel tur Dialuna y Diamars  entre 9:00 -12:00 ‘or na oficina di OPPA cu ta situa den e edificio MAHANAIM – Avicenastraat 18 na Playa. Directiva di OPPA ta considera e bustrip aki como un “get-out party” pa nos pensionadonan, esta e miembronan di OPPA. Mirando e cuponan limita, ta solamente e miembronan cu a reacciona na tempo y di biaha riba nos boletin informativo lo bebe awa limpi y por participa. Si tin hopi interes  OPPA por considera di organiza un tour asina aki atrobe den futuro cercano.

Tambe OPPA lo bay tene un REUNION GENERAL riba Diadomingo, 20 April venidero. E reunion general aki lo bay tuma lugar na  RENAISSANCE CONVENTION CENTER den L.G.Smith Boulevard na Playa. Directiva di OPPA ta invita tur su miembronan pa e reunion general importante aki, cu lo cuminsa pa 10:00 ‘or di mainta. Si pa 10:00 ‘or no tin quorum, pa 10:15 ‘or un otro reunion lo sigui. Den e reunion aki e por tuma decisionan valido. Directiva ta pidi tur su miembronan pa acudi masalmente na e reunion importante aki, unda lo bay tin hopi informacion valioso pa nos pensionadonan.

Promer cu e reunion general cuminza, esta di 09.30 – 10.00’or a.m., Maduro Travel lo presenta cu un booth y foyetonan pa duna splicacion y informacion tocante nan ofertanan di biahe na e miembronan interesa.

Directiva di OPPA no por keda sin haci uso di e occasion aki pa tambe recorda tur su miembronan, tur pensionado no-miembro di OPPA (pensionado di gobierno), esnan cu tin un “uitkering bij wijze van pensioen” y tambe tur e pensionadonan di SVb pa acudi sin falta na e reunion di Sindicatonan den Accion (SdA) cu lo tuma lugar Diasabra, 5 April pa 11:30 ‘or na Cede di SIMAR. Tambe OPPA kier recorda tur esnan concerni cu e lucha pa ‘indexering’ lo sigui Dialuna,7 April 2008 pa 7:30 ‘or di mainta riba  Juliana Plein net dilanti di Juliana School.

Corda cu union ta haci forza y uni lo nos vence sigur….

OPPA y e otro sindicatonan den accion ta pidi nos pueblo Arubano hopi pero hopi  comprension pa nan lucha sagrado pa indexering, pasobra si acaso Gobierno keda indiferente riba e asunto aki, anto no por descarta e posiblidad cu e Sindicatonan den Accion lo bay  intensifica e accionnan.

Back