Segun OPPA:

KITAMENTO DI “DUURTETOESLAG” FOR DI E PENSION TA IGUAL CU BULA NAN CABEZ 

ORANJESTAD (AAN): Den un di e reunionan cu e representante di Gobierno y cu un representante di e Sindicatonan den Accion (SdA), Gobierno a tuma e tribilidad pa kier mara e lucha pa indexering cu algun condicion. Un di e condicionnan ta entre otro cu Gobierno kier kita e “duurtetoeslag”  for di e pension di e pensionadonan di Gobierno.

    Esaki pa OPPA, esta e Organizacion di Pensionado Publico Arubano ta inaceptable, inmoral, inhumano y hasta criminal pa papia mes riba esaki.  Tambe gobierno kier bin cun “franchise”.

   Esaki lo encera cu e funcionario publico y e pensionado di gobierno lo keda paga AOV, pero ora di cobra su pension e no ta haya pension di behez di SVb mas, esta e AOV. Pa e motibo aki tambe e representante di SdA, esta Señora Magaly Brito den e reunion cu e mediadornan y cu Gobierno a bari esaki for di mesa, mencionando cu esaki no ni ta algo di menciona corda pa bay discuti ariba.

   Kitamento di e duurtetoeslag menciona kiermeen bahamento di e pension di e pensionado di Gobierno te na suela. No mester lubida cu e “duurte toeslag” ta forma mas o menos  ²/3 parti di nos pension. Naturalmente esaki lo afecta e ambtenaarnan actualmente den servicio y tambe e otronan cu lo baha cu pension despues.

   Ya caba door di  tur e medidanan cu e Gobierno actual a imponé riba nos comunidad Arubano y pa cual nos pensionadonan di Gobierno naturalmente tambe ta parti di dje, nos poblacion cu hopi dificultad por tene su nanishi riba awa, pa usa un palabra cu e prome ministro a menciona. Esta e pueblo Arubano ta luchando tur dia di Dios pa hiba un bida decente y pa sobrevivi.

   Pa hiba un bida decente y sin problema financiero y no pasa miseria ta casi imposibel awendia riba Aruba, no solamente pa e pensionadonan, pero tambe pa esnan cu tin un sueldo minimo y esnan cu ta biba di onderstand. Nunca den historia di Aruba of otro paisnan den desaroyo un costo di bida tabata asina halto esta 10,2%. Esaki  kiermeen cu cada ciudadano Arubano incluso tur pensionado ta perde den un aña debi na e costo di bida menciona mas di un luna di salario/entrada/pension.

   Pa e pensionado di Gobierno: cu ta paga casi 10% na AZV;   no ta ricibi e vakantie uitkering ni bashi-premie cu e ambtenaar den servicio si ta ricibi;  ta victima di e medidanan imponi unilateralmente door di e Gobierno actual riba nos pueblo;  tambe mester agrega e perdida di costo di bida; ta hopi, pero hopi incomprendibel cu e Gobierno cu ta yama su mes Sociaal Democrata, ainda ta ciego y sordo pa cu esaki. E pensionadonan ta pagando casi 10% di prima na AZV pasobra nan no tin un doño di trabao.

   Pero nos tin di menciona cu e ministronan y e parlamentarionan tampoco no tin un doño di trabao y nan ta paga apenas 1½% na prima di AZV. Nan a regla esaki mescos cu nan a regla nan salario y tur e beneficionan barbaro y fuera di porpocion. OPPA ta keda hopi cauteloso y lo ta e ultimo pa  yama un gobierno cu ta ‘sordomudo’ y sobretodo aparentemente ‘terco’ pa cu bienestar di su trahadornan y di su ex-trahadornan esta e pensionadonan di Gobierno (funcionarionan publico post-activo), pa ignorante.

   Esaki OPPA ta lague na consenshi di cada un ciudadano Arubano riba e pida baranca aki. Mirando tur e acontesimentonan aki no por ta otro tampoco cu e Sindicatonan den Accion (SdA) hunto cu OPPA ta sigui lucha pa ricibi parti di nan derecho adqueri esta e tan afamado ‘indexering’. No lubida cu den pasado e funcionarionan publico y pensionadonan di gobierno a sacrifica un gran parti  di nan salario y pension y a coöpera completo cu gobierno pa sali di e percancia financiero (solidariteitsbelasting y tempo cu LAGO a sera su portanan). Considera esaki como un fianza di e funcionarionan publico y e pensionadonan di gobierno, na gobierno. Pues gobierno tin sin mas e obligacion di paga e fianza aki back.

   Si acaso tin trahadornan den sector priva of otro instancianan  cu ta contra e ‘indexering’ cu e empleadonan publico y e pensionadonan di Gobierno ta luchando pe, nos ta sugeri nan pa bira miembro di un sindicato. OPPA ta kere cu si e trahadornan den sector priva tambe kier ricibi indexering, anto nan mester afilia nan mes na un Sindicato y laga nan Sindicato negocia esaki den nan CAO cu e doñonan di trabao concerni. Asina simple e asunto aki ta T’asina so nan por enfrenta nan doño di trabao, cu te ainda ta intimida y menaza esnan cu kier afilia na un sindicato.

   Por ultimo OPPA kier a invita tur su miembronan y e pensionadonan  no-miembro di OPPA y tambe tur e otro pensionadonan di SVb y esnan cu tin un “uitkering bij wijze van pensioen” sin falta y tur trahadornan di Gobierno pa acudi na un reunion informativo tocante ‘indexering’ diasabra d.d. 6 april 2008 na e Cede di Simar pa 11:30 ‘or di mainta. 

  Pa Dialuna d.d. 7 april venidero e accion di e Sindicatonan den Accion (SdA) lo sigui cu biento en popa. Mediante esaki tur e ambtenaarnan, maestronan y trahadornan di Gobierno y trahadornan di e Fundacionnan y tur e pensionadonan di Gobierno y tambe e pensionadonan di SVb, ta keda cordialmente invita pa acudi sin falta na e continuacion di e accionnan cu lo tuma lugar dialuna awor d.d. 7 april venidero pa 7:30 ‘or di mainta  riba  e plaza dilanti Juliana School na Playa.

Back