DRAMA

Tata mama y yiu mata ayera na Macuarima

ORANJESTAD(AAN)--- Presuntamente un yiu a mata su mama y tata , tambe un ruman homber ayera na Macuarima, segun informenan cu a bira conoci ayera anochi mas o menos 9.30 or.

E caso aki ainda ta sin un splicacion exacto ya cu e informacionnan cu por a haya, ta informacionnan cu a bini di e lugar di crimen y nada oficial .

Un di e informenan a menciona cu bisiñanan a nota movecion straño den e cas Macuarima 27 B y a alerta autoridadnan.

Ora cu polis a yega a bin topa e personanan morto den e cas. E prome informe a papia di un morto, despues esaki a bira dos, y mas despues a drenta noticia cu ta trata di 3 persona morto y cu aparentemente a trata di kima e cadavernan.

Tur indicacion a bay den direccion di e ruman Eugene cu lo ta un persona conoci pa polis y cu lo ta un usador di droga ademas.

Un informe a menciona cu Eugene lo a discuti cu su ruman Edvard Lampe, conocido locutor di radio na Santa Cruz, y cu Eugene lo a cohe un mokel y dal Edvard cune. E tata Juan Lampe lo a bin auxilia Edvard, tambe lo a ser gedal pa e mokel, y e mama cu a cay aden tambe a bira victima.

Pero e informe aki no por para su tras, ya cu no tabata tin aparente testigo di e hecho.

Tambe por a scucha e version cu a duna otro bista di e caso aki y cu ta duna e impresion cu e caso lo a pasa den dia caba y no den oranan di anochi.

E version no confirma aki ta bisa cu Edvard mester a bay traha merdia y no a presenta na trabao. A yame na varios ocasion pero e no a contesta yamadanan.

Tambe cu lo a bay buske na cas y a pita pero e no a sali.

Tambe cu Edvard mester a traha anochi den un bar pero no a presenta tampoco.

Si esaki por ta e caso, lo por deduci inoficial tambe y no confirma, cu e caso lo por a tuma lugar for di oranan di merdia caba.

Esaki ta haci pues, cu ta keda den incertidumbre di e drama den familia aki, te ora cu autoridadnan duna nan version ya cu Eugene lo a ser deteni ayera anochi mes.

Mester menciona sinembargo cu den un rato di ora cu e caso a bira conoci, un cantidad grandi di mirones a presenta na e cas, principalmente debi na e seriedad di e caso cu tres persona morto, y e manera cu e rumornan a circula di asesinato cu intento despues di kima e cadavernan.

Pues un biaha mas, no tin nada oficial di e sucedido aki, y ta rumor a circula te na momento di bay imprimi e edicion aki, sin cu ningun hende por a bisa kico a sosode den e cas, con e sucedido a tuma lugar y ki ora di dia of anochi.

Pesey tambe e detenido Eugene ta keda un sospechoso te cu ora informacion concreto ser duna di e caso despues di su interogacion.

E fotonan ta di e movecion cu tabata tin ayera dilanti e cas Macuarima 27 B.

DIARIO ta extende su mas profundo condolencia na familianan di e fayecidonan. 

Back