FISCAL MAYOR A BAHA PISA RIBA ATRACADORNAN

*Mos: “mi no kier pa Aruba bira manera Corsow” 

ORANJESTAD(AAN): Diabierna a tuma lugar un caso grandi di atraco.

En total un grupo di 8  persona a presenta dilanti di huez, debi na e hecho cu nan a wordo acusa di a participa na diferente atraco arma.

Mainta trempan a cuminza cu e caso contra Ulgino R.G, Gregory A.M.P, Izmar E.D, Michael R.W, Sergio R.W, George R.R, Alvin A.B y Jermaine Y.R.W.

E prome caso cu huez a atende cune ta e caso di un atraco riba un supermercado dia 11 di Juni 2007.

Tabata U.R.G kende a admiti cu e, A.A.B y un persona di fam Landsmark kende te ainda no ta deteni, a comete e atraco.

Segun declaracion di testigonan e personanan a drenta den cas di propietario di e supermercado na Mabon, unda cu nan a pone arma na cabez di un di e personanan y nan a mara tur hende den e cas.

E sospechosonan a bay cu placa y un BMW.

Mientras cu U.R.G a admiti, A.A.B a nenga di ta envolvi.

Fiscal Mayor a trece dilanti cu tabata tin otro persona cu a declara cu AAB tabata envolvi masha bon.

E di dos caso cu huez a trece dilanti ta e caso den cual U.R.G, A.A.B, J.Y.R.W y G.A.M.P a wordo acusa di a comete un atraco riba 21 di Juli 2007, na unda cu nan a drenta cas di propietario di un supermercado cu arma di candela y mara e personanan den e cas.

E sospechosonan a bay cu boternan di whisky, cigaria y carchi di telefon.

Den e caso aki U.R.G y J.Y.R.W a declara cu G.A.M.P tabata nan chofer y cu e tabata sa di e plan pa comete un atraco.

G.A.M.P sinembargo a splica huez cu e solamente a duna nan un lift manera hopi biaha e ta hasi, sin cu e tabata sa di e atraco.

Akinan tambe un biaha mas A.A.B a nenga di ta envolvi.

G.A.M.P no a menciona tampoco cu A.A.B tabata den e auto.

E di 3 caso cu huez a trece dilanti ta e caso den cual e mesun 4 sospechosonan a wordo acusa di comete atraco riba cas di propietario di un supermercado riba dia 14 di Juli 2007.

E caso aki a bira mas serio cu e otronan, ora cu durante un luchamento entre propietarionan di e cas y e atracadornan, un di e atracadornan a los un tiro den plafond.

Despues di esaki, el a tira un di e chinesnan den e cas den su pia, pasobra e tabata chocando un di e otro atracadornan.

E mesun atracador aki a tira un di e personanan den e cas tambe na su pia.

Declaracionnan di e sospechosonan mes como tambe di e testigonan, a mustra cu ta A.A.B kende a nenga di ta envolvi den e casonan, tabata esun cu a tira e personanan.

Den corte J.Y.R.W a splica huez cu ora el a drenta cu su arma, un Chines a bin riba dje.

Como cu e no kier a uza su arma di candela, el a laga esaki cay y un di e chinesnan a dal e cu un lampi riba su cabez.

E mesun chines a cuminza choke y pesey un di e otro atracadornan a tira e chines.

E di 4 caso cu huez a trata ta e caso den cual U.R.G, M.W, S.W, G.R.R y I.E.D a wordo acusa di a comete un atraco dia 29 di Augustus 2007, riba Wing Wang restaurant.

Testigonan a declara cu 4 atracador a drenta, di cual dos tabata tin cara tapa.

Akinan nan a logra bay cu cadena di un agente policial cu tabata presenta den paña civil.

Nan a logra tambe despues di un pelea dene  restaurant, bay cu mas di 1000 florin y algun carchi di telefon.

Huez a indica cu polis a haya fingerprint di I.E.D riba e caha di placa.

G.R.R a bisa cu e tabata chofer cu a duna nan lift, pero e no tabata kier a haya nada di e atraco.

Sinembargo nan a dune toch.

Banda di tur e acusacionnan aki, U.R.G a wordo acusa tambe di a menaza un persona cu “shotgun” riba 8 di September 2007.

E sospechoso Michael R.W ademas di ta envolvi den e casonan di atraco, a wordo acusa di otro casonan, cu ta  un caso di ladronicia den un cas na Seroe Colorado, ladronicia den un otro cas, como tambe dos intento di ladronicia riba 29 di Augustus 2007.

Fiscal Mayor Mos prome cu el a duna su exigencianan di castigo a trece dilanti cu ta hopi preocupante cu asina facil un grupo di homber hoben ta dicidi di comete atraconan arma, unda cu nan ta te hasta herida hende cu arma di candela.

El a bisa cu e no kier pa Aruba bira manera Corsow, unda cu hopi atraco violento ta wordo cometi y unda cu un atraco team constantemente mester vigila cierto sospechosonan.

Segun Mos, un persona mester por sinti su mes sigur den su cas y no wordo confronta cu hendenan cu mascara y arma di candela, cu dilanti mucha ta horta, menaza e personanan den e cas, maltrata nan y mara nan tambe.

Segun Mos, un castigo halto no ta solamente pa castiga e atracadornan, pero tambe pa mustra e futuro posibel atracadornan, cu nan lo haya un castigo hopi halto, si nan faya y comete un atraco.

Fiscal a exigi pa U.R.G un castigo di 10 aña, pa G.A.M.P el a exigi 30 luna, pa I.E.D el a exigi 2 aña, 4 aña pa M.R.W, 2 aña pa S.R.W, 16 luna pa G.R.R, 7 aña pa A.A.B y 4 aña pa J.T.R.W.

Huez lo duna su sentencia Diaranzon dia 23 di April.

Back