SUCESONAN 

LADRON A DJIS CANA SALI DI SUPERMERCADO CU WHISKY DEN MAN

ORANJESTAD (AAN): Presencia di polis riba Diahuebs merdia a worde solicita na e supermercado Chines, Yin-Lu situa na Noord.  Esey tabata relaciona cu ladronicia.

    Patruya cu a presenta mientras, a topa cu e doño di inicialnan J.C. di 44 aña naci na China. Segun e doño a splica, cu un cliente masculino a drenta den e supermercado y a pasa man pa un boter di whisky Johnny Walker Black Label.

    Despues di esaki e homber sospechoso a yega na caha y a pidi pa un paki di cigaria. Ora a kere cu e homber lo saca placa pa paga e articulonan, el a dicidi di bandona e supermercado manera nada no a pasa.

   Pero na e instante cu e ladron aki a sali bay , e homber Chines a bula toonbank a-la-“Bruce Lee” y a core tras di e sospechoso.

   No obstante esey, e doño chines no a logra gara e ladron ya cu el a bula den un Toyota  Corolla color shinishi  numera A-12134.

   E version policial ta menciona cu tabata tin presente personanan cu a testigua kico a socede.

   Awor e caso ta den man di Recherche.

---

HOMBER TA ACUSA SU NOVIA DI 19 AÑA DI A HORTA $1.000

ORANJESTAD (AAN): Den oranan di atardi na Warda di Polis na Noord, a presenta e dama di inicialnan C.L.B.E. di 19 aña, y e tabata solicita pa intermediacion.

   E dama a splica polis ampliamente lo siguiente.  Pa cuminsa el a laga sa cu e tin relacion cu e homber di inicialnan E.W. di 30 aña.  Pero awor diripiente e homber E.W. ta acuse di a horta 1.000 Dollar for di dje.

   Despues a scucha e version a yama e homber E.W., y e tambe a duna full e historia con el a cobra salario y apenas el a saca 100 Florin for di su cartera.

   Ta asina cu el a bay Chines y a laga su celular atras.  Anto ta e dama C.L.B.E. a bay na e lugar y busca e celular.

   Asina e homber E.W. a sigui conta cu e dama a coba den su celular y a topa cu cantidad di numbernan di telefon di otro muher.

   E dama a dicidi di copia y skirbi tur e numbernan, y asina problema a start entre E.W. y C.L.B.E.

   Despues otro problema a start, como cu e homber ta sospecha cu ta C.L.B.E. a saca e suma di 1.000 Dollar for di cartera.  Siendo cu su cartera tabata den auto.

   Ruman  homber di E.W. ta esun kende a wak e dama den cercania di e vehiculo, pues e sospecho por tin base!

   Pa colmo, un par di dia despues ata e homber E.W. a tende cu e dama ta busca auto pa cumpra, siendo cu apenas e dama hoben a cuminza traha.

   E homber no kier tin relacion mas cu e muher, pero e tin yiu cune.

   Di parti di e dama C.L.B.E.,  tur cos ta cuadra menos di e asunto di e placa cu a somenta, y el a desmenti categoricamente di a mishi cu placa di E.W.

   Polis a intermedia y a avisa e partidonan si no tin un solucion nan por acudi na Recherche. 

---

PROBLEMA ENTRE DOS FAMIA A START DJIS DEBI CU UN MUCHA MUHER TA PASA HOLE HOMBER DI OTRO

ORANJESTAD (AAN): Na Warda di Polis na San Nicolas a presenta e señora di inicialnan J.C., y su presencia tin di haber cu e kier entrega keho di menaza.

   Durante cu e denunciante ta na warda, diripiente a drenta yamada di señora E.R. naci na Colombia di 39 aña, kende a laga sa cu e tin problema cu e muher J.C.

   Polis mesora a reacciona y nan a invita E.R. pa e tambe presenta na Warda pa asina agentenan atende ambos muher. Pero a surgi problema ora cu e dos muhernan a topa otro cara-cara na warda.

   E dos muhernan a discuti formalmente cu otro y el a termina den pelea.

   Polisnan mester a bula aden pa aleha e muhernan for di otro. Cada uno a worde poni den un camber apart, pa polis a scucha kico realmente ta nan problema cu otro.

   E señora J.C. a cuminsa na splica Polis cu e tin relacion cu e homber di inicialnan R.C., y nan dos ta traha hunto.

  Ta asina tambe segun J.C., cu e yiu muher di e señora E.R. di inicialnan C.C. di 20 aña tambe ta traha na hospital. E mucha muher C.C. segun J.C. tur ora cu e pasa e ta “bay hole” e homber R.C.

    Te hasta a yega asina leu, cu J.C. a menaza C.C. y hala su atencion pa stop di hole e homber.

    E señora J.C. a bay busca su yiu na school y a topa mama di C.C.  Na e instante cu mama di C.C.  (esta e señora E.R.) a mira J.C., un discusion a start di otro mundo!  Tabata tin zundramento hasta palabranan menazante a cay.

   Polis a papia tambe cu señora E.R. el a bisa di no tabata sa ki problema J.C. tin cu su yiu muher. E kier pa J.C. laga su yiu cu paz.

   Por conclui cu henter e asunto aki, lo tin di haber cu hacimento di redo.

   Polis a intermedia cu e speranza cos lo calma. Pero den careda di 3’or central di polis a dirigi patruya n cas di señora J.C., ya cu aparentemente J.C. a manda 4 persona di famia, pa bay na e hogar di CC pa menaze.

  Debi cu e mucha muher C.C  a cuminsa grita di ta bay yama polis, e ora e grupo di persona a core bay.

   Polis lo sigui e situacion di acerca. Mientras tanto pa 5’or di atardi un miembro famia di inicialnan C.V.C. (kende ta ruman di J.C.), a laga sa di bay busca drechi kende ta busca trouble cu su famia.

   Polis tabatin basta papiamento cu e famianan. Finalmente polis a adverti e famia pa nan ‘cool down’ pa nan no lamenta despues.

Back