EXPERTONAN TA CUESTIONA RECOMENDACION DI BEBE OCHO GLAS DI AWA PA DIA

ORANJESTAD (AAN):  Segun un estudio realiza recientemente pa e Sociedad Mericano di Nefrologia si un persona ta goza di bon estado di salud, e no mester worry pa bebe ocho glas di awa (di 8 ons)  pa dia, manera ta ser indica pa hopi experto.

  Un analisis di tur e estudionan realiza riba e efectonan di e consumo di awa y salud di hende, ta sugeri cu e supuesto beneficionan di bebe ocho glas di awa ta carece di un evidencia cientifico.

  E investigacion publica den e revista di e Sociedad Mericano di Nefrologia ta destaca cu e sernan humano no por sobrebibi mas cu algun dia sin awa, pero ta existi poco investigacion cu ta valora e impacto adicional di bebe awa den individuonan cu ta goza di un estado di salud promedio.

  Tin hopi atributo relaciona cu e consumo di awa manera eliminacion di toxinanan, mantencion di organonan sano, mihor color di cuero y control di peso.

   Dan Negoianu y Stanley Goldfarb, docternan di e Universidad di Pennsylvania, a revisa e publicacionnan existente relaciona cu e tema aki y a haya evidencia riba e necesidad di aumenta e consumo di awa den personanan cu ta biba den un clima cayente y seco y tambe e atletanan.

  Na e lista mester agrega pacientnan cu malesanan concreto cu ta beneficia di e incremento den e consumo di likidonan. Esaki ta e caso di personanan cu infeccionnan urinario of cu ta padece di ‘piedra den e riñonnan’.

  E investigacion di e mericanonan ta indica cu no ta existi informacion aplicable na e individuonan cu un salud promedio.  Ademas, no tin, te dia di awe, datonan cu ta respalda e indicacion di bebe ocho glas di awa pa dia.

  Banda di esaki, e exploracion a inclui estudionan relaciona cu e supuesto cu e consumo di awa ta mehora e funcionamento di e riñonnan y ta yuda elimina toxinanan.

    E resultado ta evidencia e limpieza di e substancianan den e riñon, manera sodio y urea, ora di bebe awa, pero sin ningun beneficio medico comproba.

  Otro documentonan ta prueba e beneficio di bebe awa den e bon funcionamento di e organonan. Nan ta indica cu e retencion di likido den e curpa ta variable y ta depende di e velocidad cu esaki ta worde ingeri, si e awa ta ser guli lihe e ta desaparece, pero si ta worde bebi poco poco, e ta keda reteni den e curpa.  Sinembargo, ningun estudio ta certifica un impacto clinico den e organonan ora cu e consumo di awa ta aumenta.

 AWA Y BEYEZA:

  E doctenan Negoianu y Goldfarb tambe a evalua e teoria cu si bo ta bebe mas awa esaki lo permiti bo sinti bo yen y domina bo apetit. E defensornan di e tesis aki ta señala cu e awa ta mantene e peso y incluso ta yuda combati obesidad. Te na e momentonan aki ningun ensayo clinico a midi e relacion consumo di awa-peso.

  Segun expertonan, e consumo di ocho glas di awa pa dia a ser planea a base di e perdida promedio di likido di un individuo. Bebe awa den exceso por induci na un perdida di sodio y potasio cu consecuencianan manera calamber, ademas di un efecto laxante.

  E estudio ta confirma cu cada individuo mester midi su consumo di awa di acuerdo cu su estilo di bida y no pa medio di recomendacionnan general.

Back