Kier pa huez evita bloqueamento na cruzada di aeropuerto…

 AHATA, ATIA Y AAA TA BAI CORTE CU SINDICATONAN DEN ACCION 

ORANJESTAD(AAN):Un sentencia di huez den un conflicto laboral semper ta pa tur dos partido por yega na un solucion.

Huez nunca ta tuma parti totalmente pa un solo partido, pero ta laga espacio pa tur dos por maniobra y yega na un solucion si tin disponibilidad.

E biaha aki huez a permiti gobierno prepara su mes, pasobra a notifica e sindicato cu for di adelanta mester anuncia su accion na pia di trabao.

Esey a sosode tambe. Awe diasabra, te hasta toren di control por bai den accion for di 12’or di merdia te cu 6’or di atardi.

Algo cu prome minister ta masha rabia cune, pero mester bai biba cune.

Prome minister den e caso aki te hasta a pidi gremionan comercial pa busca nan derecho pa asina nos ser afecta pa e lucha di empleadonan publico.

Gremionan comercial AHATA, ATIA y AAA ta sinti cu diasabra merdia na momentonan mas druk na aeropuerto un biaha mas e empleadonan den accion luchando pa indexering lo sali bai cana direccion di cruzada di aeropuerto.

Sindicato den accion mes no a anuncia ningun marcha di protesta, pero mirando cu e tres instancianan ta asumi esaki a haci cu nan ta bai direccion di corte y purba convence huez pa evita esaki si sindicato den accion tin e den mente.

Pa 9’or di mainta e caso lo tuma lugar y asina mes e reunion di sindicato den accion lo sigui pa 11’or y 30 na SIMAR.

Por spera cu e interes pa e caso aki lo por ta grandi awe mainta, ya cu pa varios dia caba por a tende comentarionan di cu AHATA y ATIA lo bay trata na brua tera durante e demostracion di empleadonan publico siendo cu nan no ta forma parti di e conflicto entre e sindicatonan di empleadonan publico y gobierno.

Ayera por a tende atrobe comentarionan relaciona cu e posicion cu AHATA y ATIA ta tumando, indicando cu e organizacionnan aki ta mira solamente nan interes y lo ta usando “pilar di economia” atrobe como nan frasenan favorito pa traha riba comunidad.

Back