Den beach na Boca Catalina:

 BON RESULTADO DI “BEACH ASSESSMENT” TOCANTE DERAME DI AZETA

ORANJESTAD (AAN) – Señor Bibi Arends, encarga cu oficina di calamidad, a duna prensa mas detaye tocante e cuatro dianan di tayer di trabao cu a tuma lugar na Aruba, tocante “oil spill”, y cu a culmina ayera.

Sr. Arends a splica cu a trata di cuatro dianan di reunion masha intensivo y educativo tocante derame di azeta y tur su facetanan.

Como cu ayera, diabierna 4 di April, tabata e ultimo dia di e tayer, den e programa tabata stipula un asina yama “beach assessment”. Esaki a consisti di bishita cierto areanan y haci un investigacion profundo con e situacion di e beach ta, si tin restonan di derame di azeta, of si un dia esey sosode con ta defende e beach.

“Asina nos a haci uso di e beach na Boca Catalina, cu na aña 1999 cu Horcan Lenny cu a bin di pabao a causa hopi desaster, hopi boto a kibra y e barco cu ta gesink na Antia e tubonan a kibra, anto azeta a cuminza sali for di e barco bieu cu a zinc den tempo di guera.

Anto, rapidamente e tempo ey nos mester a spuit y pone bump pa e resto di e azeta no bay den direccion di e hotelnan. Y e olanan bruto, hunto cu loke nos a spuit a haci un bon trabao, pero semper nos a keda duda si e lugar ey a keda daña.

Pesey nos a probecha e tayer di trabao aki y tur e delegacionnan, parti den cuatro of cinco grupo, a bay tene un inventario; un estudio profundo cu nan experiencia, pa weita kico tin na costa y den awa, y haci un investigacion si tin rastro ainda di derame bieu”, Arends a duna di conoce.

Como un informacion preliminar, sr. Bibi Arends a bisa cu e resultado ta hopi bon, ya cu a worde constata cu fuera cu e naturaleza a worde limpia, a kibra e resto di azeta cu a keda eynan y tur e delegadonan hunto, incluyendo esnan den Caribe, a duna e impresion cu e lugar ey ta hopi bon ainda.

E resultado final ta cu tog, cu e lugar ey a recupera di e derame di azeta di e barco gesink na Antia y cu e ta un lugar cu por bisa cu si algo sosode, lo por traha un plan con pa defende den futuro.

  Back