E anarquia di Nel!

            Di cu na Aruba nos ta bibando etapanan di anarkia y despotismo impulsa pa Nel y su partido no tin duda, y di cu cosnan ta ser gebolter pa cumbini e postura di Nel y su grupito di privilegiadonan tampoco ta discutible. Loke ta pasando na Aruba no tin mester di splicacionnan adicional, djis wowonan pa lesa y horeanan pa scucha. E actuacionhan ultimo di Ministerio Publico y e Comisario di Polis treci for di Hulanda cu hopi fanfaria, ta lagando hopi di desea pa loke ta trata e aplicacion imparcial di husticia, Ta desde cuando mester invoca e presencia di un Fiscal Mayor y un Comisario di Polis pa un simple caso di ‘dal y core bay’? Acaso pa cualke otro ciudadano e mesun norma ta ser aplica? Claro cu no! Aki ta trata di un di e “intocabelnan” di MEP, partido pesta di escandalo y corupcion!

Cu semejante cuidadornan di husticia en realidad no tin mester di caso ni corte! Esey ta e realidad tristo cu ta vigente na Aruba. Nos tin un Gobierno cu ta nenga tur derecho politico na su adversarionan, y pesey mes, no ta di nan cu por spera e regeneracion di nos comunidad, sino di e iniciativa y e curashi di un man yen di balente dispuesto di enfrenta cualke consecuencia o sacrificio  pa mira e retorno triunfal di virtud, moral y decencia politico den e mundo putri di politica. 

Si bo tin bril di palo bisti, nan ta tolerabo; si bo ta un batido di man pa cualke un di nan payasadanan, bo ta okay; si bo ta un lembedo pa haya cualke permiso o fabor, bo ta aceptable; si bo ta dispuesto di mira otro caminda mientras un despoho brutal di  e propiedadnan publico ta tuma lugar, bota un adepto.  Pero, si bo tin un mente propio, si bo tin e tribilidad di lanza cualke critica, si bo ta dispuesto di subi caya pa exigi un derecho, manera indexering, bo ta contra MEP y su gobierno corupto, y bo ta bira automaticamente un candidato pa persecucion. Esaki ta e mundo maraviyoso di Nelson Orlando Oduber y su gang di delincuentenan. Poco poco e sindicatonan ta siñando conoce e berdadero cara di e mandatarionan aki, y e falsedad cu ta biba den nan curazonnan! 

E hendenan ey no tin compasion pa Pueblo. Su sufrimento no ta motibo di preocupacion pa nan; su problemanan ta di nan, no di Gobierno, ni maske ta Gobierno a crea e problemanan ey cu e recargo di medidanan imposible di asimila cu salarionan stanca. Tur esaki ta e sintoma pavoroso di un anarkia di pensamento y di accion di parti di un Gobierno adicto na medida y indiferente pa lo demas. 

Pero, no mishi cu e huurnan barbaro paga na e ruman di Hendrik y Rudy_, y na Hendrik mes y su yiu! No mishi cu e fortuna poni den e mannaan di dos bufete di abogado! Dios libra bo cuestiona e tumamento den servicio di tanto ruman, primo y otro familiarnan di Nel!

            Den tur e actuacionnan di Nel bo ta nota e embestida di venganza! E no ta pensa den nada otro.  Mescos cu Romulo Betancourt tabata haci ocasionalmente, Nel a adopta como custumbra, esun di alimenta su odionan tur mainta cu awa di Balashi y picante di papaya. Ta ki tempo ta kede pa dedica na e bienestar di un Pueblo cu ta sufriendo embatenan di su Gobierno corupto?

          Ta riba kico Pueblo ta warda pa caba cu e omnipotencia di Gobierno? E ta dispuesto di sigui ser trata cu e reglanan inferior na esnan aplica na esnan aplica na e grupito di privilegiadonan conoci den boca di Pueblo como 'friends and family'? Djis pensa riba e caso di Hendrik, y saca boso conclusion!

         Awor, ki dia Nel, cu e mentalidad politico di un dictador, ta bay pidi dispensacion pa tur su abusonan y menazanan? E debe Pueblo por Io menos esey, despues di siete aña di e castigo severo na cual el a somete, prome cu e baha! Pa mi ta hasta inmoral mira un tirano rondona di tanto inmundicia, sali di un piscina politico limpi di mancha! Dedenan acusador Io sigui señale como un complice di tanto escandalo y corupcion, indicativo di e bancarota di su caracter politico!