|
|
|
|||||||||||
|
Informacionnan nobo pa Careda di Garoshi Aña di La Reina ORANJESTAD (AAN)--- Recientemente a tuma lugar un conferencia di prensa na Cosntructions Cafe, caminda a informa ariba e delaster detayenan di e careda di garoshi cu lo bai tuma lugar ariba 30 di April, Dia di La Reina.
For di un principio e informacionnan tabata circula cu e evento aki lo mester a tuma lugar na San Nicolas, sin embargo e locacion di esaki a wordo cambia awor pa tuma lugar na Playa, particularmente na Ponton. E informacionnan ariba e careda aki a lanta e interes di un y tur pa e tipo di competencia aki cual ta uno hopi divertido y ademas hopi bunita pa aprecia den compania di amigonan y famia.
E lugar caminda e competencia aki lo bai tuma lugar awor ta e trayecto for di Valero Ponton te Rotonde Ponton cual ta un bahada di mas of menos 2 Km. A scohe e caminda aki pa motibo cu e ta un trayecto casi stret y ademas e ta un bahada lo cual ta haci esaki optimal pa e tipo di competencia cu lo bai tuma lugar. Relaciona cu e competencia mes, esaki lo bai ta stilo Drag race, of sea cu 2 autonan lo bai competi cada biaha. Na liña final e autonan lo pasa via e caminda na banda pa subi te na e punto di salida si ta e caso cu e auto lo mester competi un biaha mas. E prome rond di caredanan lo bai ta di eliminacion y despues lo bin e rond di ganadornan. E competencianan aki ta programa pa cuminza pa 10’or di mainta te ora e rond di ganadornan finaliza.
E categorianan di e competencia ta lo siguiente: 8 pa 12 aña, 13 pa 17 aña y 18 bai ariba. Tambe por competi via companianan, esaki ta cu si un compania kier participa cu varios empleado, por hasi esaki participando den e categoria aki y por decora e auto cu e colornan y e logo di e compania of e producto cu e compania ta representa. Otro categoria participante ta “Battle of the Schools”, aki tur school por participa cu nan auto. Mester enfatisa cu den e competencia aki, un auto tin mag di participa den diferente categoria, dus no tin restriccion ariba esaki, unicamente cu e auto mester wordo registra den cada categoria cu e participantenan ta desea pa competi. Pa registra pa participa den e competencia aki mester pasa na Checkpoint Color na Columbustraat pa ricibi e instruccionnan di contruccion di e autonan y tambe e reglanan di competencia y seguridad. Den otro edicion nos lo bin cu mas informacion ariba e competencia aki. |
|||||||||||
|
|
||||||||||||
|
||||||||||||
