CELEBRANDO CUMPLEAÑO DI MAYA CU CAR-RALLY

ORANJESTAD (AAN): Un fabuloso party tabatin den fin di siman, na residencia Croes na Bloemond.

   Esey ta debi na e hecho, cu e simpatica Maya Croes a festeha su cumpleaño.  Awor si e ta cla pa rijbewijs

   El a festeha esaki den forma di un Car-Rally y Scavenger Hunt, y hunto cu Albert y demas coleganan di IPA, nan a pasa momentonan hopi agradable, y tur hende a goza un mundo.  Riba combinacion di potret por mira mas di e fiesta aki.

Un dia di presentacion y coronacion di e Reina di DUCAFriends

ORANJESTAD (AAN); Informacion for di Amsterdam ta indica cu Diadomingo cu a pasa, e grupo di DUCAFriends a tene un dia di informacion na Amsterdam Zuid-Oost.  Nan ta cla pa Carnaval!

   Tur hende cu tabata interesa den join nan grupo a bin pa sera conoci cu e crew, inscribi y por a wak e schetsnan y video.

   Un par di e kostuumnan a worde demostra ariba popchi y en vivo door di e damanan cu lo join nan grupo, nan a cana rond show nan kostuum.

   Durante e encuentro Sr. José Tromp groepsleider di DUCAFriends a corona nan reina, Srta. Sabrina Poerier a bira Miss DUCA CARNIVAL QUEEN 2008. Sabrina su Tata ta Arubiano y su Mama ta bin di Indonesia.

   Na aña 2006 Sabrina a sa di bay cu e titulo di Miss Rio aan de Rijn, un actividad cu ta tuma lugar ya pa 5 aña na Arnhem.

   Tambe Sabrina a bay cu e corona pa e titulo di "The best of five" na aña 2007 na Nijmegen, e tabata un battle entre e 5 Miss Rio aan de Rijn cu a yega di gana e titulo ey den pasado.

   E cushina tabata bon surti, cu pastechi, bolo di cashupete y di pruim y platter di Galiña. 

   E dia a bira uno masha agradabel. Di mes cu e calypsonan tabata resona den background y ora e cancion "Music is the language" a toca casi tur e invitado y participantenan a dal un polonaise a la Caribense henter e sala rond.

DUCAFriends ta worde reforza awor cu Sr. Ricardo Donata, conoci pa hopi hende den e parada di carnaval na Aruba. Ricardo lo bay yuda e crew y tuma e show cu Sabrina lo bay presenta na e eleccion di Miss Zomercarnaval na su encargo.

   E fecha di e eleccion di Reina lo tuma luga Diadomingo dia 20 di Juli 2008 y e fecha di e Zomercarnaval lo ta Diasabra dia 26 di Juli 2008, ambos na Rotterdam.

Cla pa Miss Teen World International

GILLIENNE ALBERTSZ DI ARUBA RUMBO PA BAHAMAS

ORANJESTAD (AAN): Nos flamante Miss Teen Aruba 2007, Srta Gillienne Albertsz ta den pleno preparacion pa representa e isla den e certamen di Miss Teen World International.

   DIARIO a haya sa, cu esaki lo tuma lugar di dia 30 di April pa 5 di Mei na Bahamas.

   Ya caba Gillienne ta cla prepara pa e reto aki y sigur lo laga nomber di Aruba, bon na halto y JE Foundation tin e siguransa cu Gillienne lo haci un tremendo papel. Gillienne lo bay ta asesora pa Edgar Kock cu lo bay hunto cune.

   Gillienne lo bay tambe cu un vestuario impecable cu sigur lo causa un impacto na Bahamas. Ya caba nos ta desea nos embahadora hubenil tur clase di exito pa e reto aki di representa Aruba na Bahamas den e certamen Miss Teen World International. Nos lo keda pendiente pa e detayenan di Gillienne den e certamen aki.

JUICE NOBO DI VICTORIA BOTTLING A YEGA! 

“Crea un nomber pa nos lemonade y gana!”

ORANJESTAD (AAN): Riba Diamars mainta, e compania local Victoria Bottling Company distribuidor di Nesbitt’s aki na Aruba, a lansa su campaña “Crea un nomber pa nos lemonade y gana!”.

   Victoria Bottling Company pronto lo ta lansando riba mercado un lemonade cu un sabor Arubiano cu ta hopi refrescante y alavez saludabel. E lemonade aki ta worde traha cu awa di Aruba, lamunchi pero tambe cu honing y locual ta hacie mas interesante ainda ta cu e no ta contene gas ni tampoco aditivo!

   DIARIO tabata presente na Windows on Aruba, ora cu e compania hunto cu ECA NV a informa di e campaña aki.  Na mesun momento, DIARIO a haya chance pa saborea e juice aki, cu ta hopi dushi mes.

   Pa participa na crea un nomber nobo pa e product refrescante nobo aki ta hopi facil; djis bay na e website:  www.arubaslemonade.com y yena bo nomber creativo y unico pa e producto, sigui despues pa bo nomber, fam, e-mail adres, telefoon y despues primi send pa manda bo e-mail pa participa.  E gran premio pa esun cu su nomber resulta e ganador ta un iPod Video y lemonade sabroso y refrescante pa un luna GRATIS!

   Victoria Bottling Company ta gradici di antemano un y tur cu participa, e campaña lo termina dia 8 di mei 2008.

Rotary Club of Aruba  

TUR COS TA CLA PA FIESTA ROTARIA 2008, YUDA NAN CUMPRANDO E FAMOSO RIFA

ORANJESTAD (AAN): E evento cu sigur hopi hende ta plania pa bishita tur aña ta e famoso Fiesta Rotaria. Rotary Club of Aruba ta cla pa presenta Fiesta Rotaria 2008 mas grandi cu nunca. Tur cos ta cla pa Fiesta Rotaria 2008.

Dialuna anochi  Rotary Club of Aruba a tene su reunion semanal, na unda cu tur e miembronan di Rotary y nan partners  a bini hunto den anticipacion pa cu Fiesta Rotaria 2008. Durante di un reunion masha ameno tur hende a topa y ta mira cu yen di gana pa e evento di mas grandi di aña di e club di servicio aki.

   Tur miembro di Rotary Club of Aruba ta traha masha duro mes tur biaha pa por haci e evento aki posibel. E Steering Committee y e Chair Persons Committee hunto cu e Presidente di e club, Sr. Bert Kamsteeg, a trece dilanti tur locual cu lo tin pa ofrece e pueblo di Aruba diadomingo awor.

   Tambe Gerald Luiden, Presidente di e Steering Committee a manda un invitacion pa henter e pueblo di Aruba asisti, pasa un rato agradable cu bo famia y alavez yuda Aruba. Pues no perde, dia  13 di April for di 10’or di mainta te cu 6’or di atardi, dilanti Talk of the town. Lo tin entre otro e seccion di hardware cu muebles y computers. Lo tin paña, mata, comestibel, buki, kids corner, food corner y mucho mas.

   Lo tin tambe e famoso dunk tank cu personanan conosi den comunidad manera, parlamentarionan, reporteronan, representantenan di companianan grandi ariba nos isla y ministernan. Lo tin ariba escenario Caha di Orgel Nelson Sprok, Pierewietjie, Club di baile Movimiento, steelband, Nico Connor, NBO y Tsunami. No lubida di cumpra e famoso rifa cerca e miembronan y durante Fiesta Rotaria mes. E premionan ta:

1. Pick Up 4x2 Nissan Frontier 2008

2. Crusero pa dos persona Maduro Travel Herfst Vakantie

3. Un television Plasma di AMC Unicon

4. Dos ticket AUA-Amsterdam-AUA cu KLM

5. Un computer plus printer di Boolchand’s

6. Dos ticket AUA-USA-AUA cu American Airlines

7. Afl.1,500.0 Gift Certificate Hagemeyer

8. Afl.1,500.- Compa Leon Moneycard CMB

9. Afl.1,500.- Gift Certificate di Boolchand’s

10. Afl.1,000.- Gift Certificate Ling & Sons.

Pues, asisti na grandi y cumpra barata mientras cu bo ta oasa ratonan ameno cu bo famia. Yuda Rotary pa asina Rotary por yuda Aruba. Fiesta Rotaria 2008.

Rotary Club of Aruba

CMB BANK A ANUNCIA UN 2007 SUMAMENTE EXITOSO 

Nan ta comparti e exito aki cu Aruba 

ORANJESTAD (AAN); Dia 2 di april, 2008, Caribbean Mercantile Bank N.V. a tene su reunion di directornan y alavez a presenta resultadonan di 2007 cu a publica den media local.

   Di e manera aki CMB ta tene tur su clientenan y pueblo en general al tanto di su desaroyo como miembro integral di e comunidad comercial y social di Aruba, sigurando asina e confianza mutuo entre comercio, gobierno, clientenan y Banco mes.

   Un biaha mas esnan di CMB a conta ariba presencia di su Directornan local y internacional pa discuti e resultadonan y desaroyonan positivo di e Banco su operacionnan ariba nos isla. Un grupo di gerente di CMB a topa cu e miembronan di e junta pa asina comparti algun noticia special. A ser anuncia dos donacion importante pa dos organizacion cu ta na vanguardia di diferente aspectonan di nos bida diario.

   E promer tabata Aruba Hospitality & Security Foundation, representa pa Sr. Jan van Nes, kende a ricibi un check di 15,000.00 Florin for di Sr. Bill Carson (General Managing Director) pa yuda e organizacion aki cu ta encarga cu seguridad di areanan commercial ariba nos Isla pa asina turismo y economia por sigui florece. Sr. Van Nes a expresa cu e preocupacion number un pa e persona cu ta biaha ta seguridad y cu Aruba mester sigui mantene su imagen como un isla “safe”.

  E di dos recipiente tabata Sr. Chucho Hoek, director di school di Musica Rufo Wever, cu a ricibi un check di 10,000.00 Florin for di Sr. Javier Wolter (Managing Director). Sr. Hoek a splica cu e fondo aki lo worde worde usa pa un proyecto specifico di transcribi y cataloga profesionalmente musica original di nos tatanan di cultura Rufo Wever y Padu del Caribe cu te awor aki a sosode pasa di musico pa musico, unicamente via oido. Di e manera aki lo preserva e musica aki den su forma original pa generacionnan cu ta bin.

  Durante e encuentro tambe Sr. Chicu Capriles, presidente di junta di directornan di CMB, a haci uso di e oportunidad pa presenta Señora Diana Daal-Croes (Audit Officer) cu e broche di 35 aña di servicio cu a bay acompaña pa un bonus.

  Tambe a ser comparti cu esnan presente e noticia cu Caribbean Mercantile Bank N.V. a ser otorgá e Premio di Oro di Summit Awards International pa su “Annual Report 2005 – The Path of the Lion”. Un logro cu Sr. Lionel Capriles a comparti cu esnan presente y Sr. Armin Solognier (Marketing & Business Development Officer). 

  CMB den nomber di su junta di directornan, gerencia y staff kier a un biaha mas gradici su clientenan y Aruba pa e confianza cu nan ta pone den e Banco y su hendenan. E banco ta orguyoso di un aña 2007 exitoso cu di berdad ta confirma cu Aruba ta un bon lugar pa haci negoshi.

Awenochi na TV

ARUBA MODEL SEARCH CU “RECYCLE DENIM SHOW” 

ORANJESTAD (AAN): E tremendo programanan di AMS2008 cu ta halando hopi atencion na Aruba ta presenta awe pa 9’or di anochi na Tele Aruba Canal 13 e impresionante show di “Recycle Denim” pa EcoTech.

    E participantenan di AMS2008 definitvamente a sa di traha arduosamente pa asina presenta tremendo ideanan creativo ariba escenario y a traha duro tambe na presenta nan “slogan” di EcoTech.

    Awe nos isla completo por aprecia e tremendo creatividad di e participantenan di Aruba Model Search 2008.  Fuera di esaki tambe por admira e seminario di Keune, tiña official di AMS’08, y algun make-overs cu a worde realisa durante e seminario aki. 

 Ya caba e participantenan ta preparando nan mes pa e proximo Mayor Casting di AMS2008 cu lo worde presenta otro siman !  Aki e cuerpo di jurado lo seleciona 30 participante masculino y 30 participante femenino cu lo continua den AMS2008.  Un total di 10 participante lo worde manda cas otro siman.