Analisis politico 

UN LUCHA HUSTIFICA 

ORANJESTAD (AAN): E lucha di e sindicatonan di e empleadonan di gobierno ta hayando mas forza cada biaha cu nan gana un caso dilanti di Huez. Di tur manera nos gobierno di MEP a trata di para e actividadnan di esnan cu ta den accion.

   Ta incomprendibel cu gobierno no ta realiza cu trece e sindicatonan den Corte no ta e solucion pa e problema cu e gobierno mes a ocasiona. Poco poco e dirigentenan sindical ta cuminza realiza cuanto e gobierno a gaña nan desde 2001. Pa cuminza na inicio di aña 2002 ora cu e gobierno a caba di sinta e ministronan a convence e sindicatonan cu nan a hereda un chaos financiero y door di esey no tin espacio pa paga indexering.

   Awor ta resulta cu e tempo ey e gobernantenan a sconde e hecho cu e gobierno anterior a laga mas cu 200 miyon Florin atras cu no a worde gasta. E dirigentenan a guli e  mentira di e tempo ey y a laga gobierno na paz. Awe tur e dirigentenan ta na haltura cu no solamente e gobierno cu a sinta na fin di 2001 a haya un reserva grandi pa por a traha cune pero den corto tempo medidanan a cuminza bin pasobra no tin placa suficiente pa yega pa e gobernantenan aki.

   E problema cu gobierno tin awo ta cu di ningun manera nan por convence e empleadonan publico cu berdad no tin manera pa paga loke e empleadonan aki tin derecho ariba dje.

   Ora mira e cantidad di hende cu e gobernantenan di MEP a pone ariba sueldonan halto den gobierno y conta cuanto esaki ta costa nos pueblo pa aña ta bisto cu un suma altissimo ta bay perdi di e manera aki. Nel Oduber so tin henter su famia cobrando entradanan grandi di gobierno di tur sorto di manera. Ta logico ora cu e empleadonan publico mira e abuso cu ta worde haci cu placa di pueblo pa paga familiarnan innecesariamente cu un rabia grandi a crece y cu lo ta casi imposibel pa haya esnan den protesta pa bay traha back.

   Ora e empleadonan publico mira cuanto miyon Florin ta bay na huurmento di edificionan cu ta pertenece na rumannan y sobrinonan di e ministronan nan ta sinti cu nan lucha ta mas hustifica cu nunca. No por ta asina cu ruman y sobrinonan di e ministronan ta haya entradanan di miyones sin cu nan tin derecho ariba dje y e trahadornan di gobierno ta worde nenga loke si nan tin derecho ariba dje.

   Awor ultimo nos por a lesa den e medionan di comunicacion cu un di e miembronan di MEP cu tabata abogado defensor di e trahadornan di Aruba, Ady Thijsen, a worde cumpra door di e gobernantenan cu tabatin mester di su sosten den Staten pa nan keda ministro. Desde cu el a protesta contra e corupcion den gobierno cometi door di e ministronan di MEP Nel Oduber mester a sera Ady su boca door di cumpre dunando su oficina un serie di caso di gobierno pa atende. E mente di nos gobernantenan ta putri y awo poco poco e dirigentenan sindical ta cuminza sinti esaki den propio cuero.

   Muy en particular esnan cu den pasado a bringa pa MEP sinta den gobierno pa mehora nan situacion awe ta yorando pasobra nan a mira e maldad di MEP y nan a realiza awo cu en berdad e grupo di dirigente di MEP ta un grupo di criminal bruto sin escrupulo cu ta hortando pa nan mes y ta trapando e pueblo di nos isla. Awo cu nan ta consciente cu nan lo no dura mucho mas den gobierno nan a bira mas fanatico di hortamento cu nunca.

 Nan a para bira burdugo di nan prohimo sin lo minimo di sintimento pa e daño cu nan ta haciendo tur dia mas. Ta increibel cu e hendenan aki di MEP  no ta realiza cu nan ta bay keda biba na Aruba y cu e pueblo cu a worde asina mal trata lo no lubida kico nan a pasa aden. Tin biaha ta parce cu e gobernantenan di MEP ta kere cu nan ta sinta ariba e stoel di ministro pa semper.

   Ta parce cu nan ta lubida cu tin un mañan cu nan no tey mas y esnan cu lo bay tuma over por bay haci mescos cu nan a haci. Awe ta mustra cu nan ta realizando cu fin di e gobierno aki ta yegando.

                                                                                              Back