Segun Monique Kuiperi, Presidente di FAA:

FUNDACION AUTISMO A LANTA CU E META DI DUNA MAYORNAN CONSEHO Y GUIA   

ORANJESTAD (AAN):   Dia 2 di April a wordo decreta como ‘Dia Mundial di Concientizacion riba Autismo’, cual a ser reconoci pa e Asamblea General di Nacionnan Uni.

  Autismo ta un trastorno mental cu te dia di awe no tin cura pe. Hopi mucha rond mundo ta worde diagnostica cu e problema aki sin cu tin solucionnan inmediato pa loke ta nan tratamento y nan proceso educativo.

  Na Aruba, tin indicacion cu e situacion no ta diferente compara cu esun di Merca of otro paisnan.

  Pa haya sa kico ta pasando na nos isla relaciona cu e problema di Autismo, DIARIO a tene un entrevista cu Presidente di Fundacion Autismo Aruba, Señora Monique Kuiperi.

  Nos a acerca Señora Kuiperi y a puntre na prome lugar con Fundacion Autismo a lanta y kico ta nan funcion na e momentonan aki.

  El a splica cu FAA a lanta na 2003 door di e iniciativa di algun mayor, entre nan e cu Sra. Dilma Arends. Nan a cuminza topa otro riba un ambiente social, familiar, pa combersa riba e topico di nan yiunan cu tambe tin e problema di autismo.

  Durante e proceso, a señala, nan a realiza cu na Aruba no tabata tin ayudo ni fuente di informacion ni tampoco un instancia cu por duna un guia riba ki caminda por cana y unda por haya mas informacion.

  Despues cu nan tabata un tiki mas leu riba con pa anda cu nan yiu, a agrega, nan a bisa cu lo mester bin un organizacion na Aruba cu ta traha na bienestar pa e muchanan y e famianan cu tambe tin di haber cu autismo.

  Nan a topa un par di biaha y nan a yama un grupo cu cooperacion di un psiquiatra di mucha kende di forma anonimo a pasa nan un email informando e personanan aki riba e iniciativa di busca mas mayor.

  Un par di biaha nan a sinta hunto y asina poco poco na Juni 2005, FAA a keda oficialmente funda cerca notario.

  Eynan nan a cuminza cu nan reto pa sigui cu nan meta di duna conseho y guia na tur mayor of persona cu tin un mucha cu autismo den nan famia.  “Te dia di awe esaki ta keda un challenge relativamente grandi”, Sra. Kuiperi a expresa.

  A añadi cu nan directiva originalmente tabata consisti solamente di mayor y den e caso aki tur tabata mama, pero tur e tatanan tabata duna sosten na e mamanan aki pa ta den e fundacion y pa haci nan trabao den esaki.

  Poco poco nan a cuminza sinti e falta di mas conocimento, mas experiencia riba diferente tereno. Nan a bin den contacto cu Aruba Rotary Club cu a duna nan un donacion.  Despues, Rotary Club tabata dispuesto pa yuda FAA riba e parti con pa sigui desaroya e organizacion na un nivel mas profesional, a bisa.

  Dos miembro di Rotary Club  a drenta den e directiva y aworaki nan ta consisti activamente di cinco, pero oficialmente di seis miembro di directiva, a laga sa.

  For di comienzo, nan a tene varios encuentro di mayor na un nivel hopi simple. Radisson Hotel a pone un sala di reunion disponible pa nan caminda cu nan por a sinta ricibi mayornan, duna nan informacion, papia cu nan.  Esey, a declara, tabata e prome stap den direccion di ofrece un tiki guia y ayudo na mayornan cu tin un yiu cu autismo.

  Actualmente, FAA no ta conta cu ayudo di un experto cu por duna nan sosten, pero normalmente nan ta haya guia door di un psiquiatra di mucha.  A señala cu door cu nan mes a yega di atende congresonan internacional, nan mes durante e procesonan a siña hopi cos y a haya hopi experiencia. Nan a bira locual ta ser yama un ‘experto di experiencia’ y den casonan caminda nan tabata duda, cu nan por guia e mayor, dune e informacion corecto, semper FAA tabata y ta referi na profesionalnan, esta docter di cas pa asina aki nan yega na un psiquiatra di mucha cu ta e persona adecuado pa duna un diagnostico riba e tereno aki.