Triple A y gobierno a hiba SIMBA Corte: 

LUCHA PA INDEXERING A BOLBE HAYA AYERA, BENDICION DI CORTE! 

ORANJESTAD (AAN) – Abogado di Sindicatonan den Accion mr. Edwin Duineveld a referi den entrevista cu nos redaccion, na e caso cu a worde lanta contra e sindicato di bombero SIMBA, tambe den e contexto di e welga di empleadonan publico.

E abogado a duna di conoce cu si cliente SIMBA a worde yama den Corte door di Triple A y Land Aruba door di un accion cu a ser menciona caba den un carta cu a bay despues di sentencia di dia 3 di April, na unda nan ta anuncia cu manera Huez a stipula den dicho sentencia nan no ta bay haci ningun accion den e postnan di Tanki Flip ni San Nicolas y esun cu ta conta pa Playa (aeropuerto). Pero e ta conta si acaso algo sosode na Wayaca, Mahuma, etc.

Abogado mr. Duineveld a bisa cu el a expresa cu Cuerpo di Bombero lo ta activo pa henter Aruba pero no den e oranan stipula door di Huez mes (12’ or merdia pa 6’ or di atardi) horario den cual nan lo no ta activo na aeropuerto. E abogado a subraya cu gobierno y aeropuerto mester wak ki decision nan ta tuma si tog laga avionnan baha, locual ta bay ta bao di nan responsabilidad.

E abogado a menciona cu su cliente a bisa cu nan ta funciona manera Huez a stipula, pero no por nenga nan pa no tene accion completamente y nan no ta bay duna servicio na aeropuerto mescos cu otro departamentonan entre e horario indica prome.

Otro Huez a bisa ayera cu e no ta haya e accion aki fuera di locual e Huez anterior a dicta y a duna SIMBA razon.

Den e defensa di triple A y gobierno, nan a bin cu e Comandante di Brandweer y a lague bisa cu si e bomberonan ta para pafo nan lo no yega na tempo si algo sosode na aeropuerto, mientras cu mr. Duineveld a bisa cu den trabao normal hopi biaha nan ta cana of nan ta patras y tin biaha nan ta mas leu for di unda nan tin cu sali, cu ora gewoon nan tin cu para dilanti porta, cu si algo sosode nan por drenta den accion di biaha y no tin nada pa stroba nan yega na tempo unda tin necesidad.

Pero SIMBA ta haya cu mas bien e tabata otro intento di parti di gobierno pa kibra nan lucha.

E hecho cu tin reglanan internacional di aviacion cu tur hende envolvi cu aeropuerto mester atene na nan, esakinan ta conta pa tur pais, pero segun e abogado esey no ta nifica cu por nenga e bomberonan pa tin accion. Otro aeropuertonan na mundo tambe a yega di bay den Welga, manera tabata e caso na Merca un par di aña pasa unda a pone trabao abao y casi henter e pais a bay plat.

Abogado mr. Duineveld a subraya cu tanten un accion ta hustifica, y te awe Corte a bisa cu tur e accionnan di empleadonan publico ta hustifica, no tin ningun razon pa stroba SdA den su lucha. El a reitera te awe e accion ta completamente hustifica y un biaha mas a haya bendicion di Corte.