Gobierno kier deshaci di pruebanan y baha pronto! 

BOM DI PLACA TA REMENTA DEN MAN DI NILO! 

*Hasta BBO a bolter contra nan mes

*Nilo a crea graf pa rapport Mehran y Emy a permitie

ORANJESTAD(AAN)— Deshaci di tur prueba pa pueblo no haya sa kico ta e resultado di dos Gobierno Oduber! Baha! Esey ta e plan di Gobierno Oduber, cu en berdad no tin placa pa paga nada mas! Futuro ta sumamente scur pasobra no solamente no tin placa mas, pero e balanza di pago di Aruba a worde afecta.

 Reservanan internacional a baha. Esaki tabata e motibo pa introduci BBO, cu a bolter contra Gobierno tambe. Un maneho increibel a worde hiba door di e Gobierno aki, cu a crea un graf pa rapport Mehran y haci imposibel pa otro aña cumpli cu loke Hulanda a pidi! E bom di placa a rementa den man di Nilo! Informacion ta mustra cu na 2005, ora MEP a gana eleccion, e tabata sa cu ya Gobierno Oduber III a hinca Aruba den problema serio!

DIARIO ta haya razon, pasobra DIARIO ta haci su trabao di investiga. Awe 11 or di mainta, mientras Algemene Rekenkamer Aruba, cu ta worde dirigi diariamente pa e bedrijfseconoom Drs. Emy de Cuba bay pidi Parlamento pa no profundiza y yega na berdad di loke cifranan di 2005, 2006 y hasta 2007 ta mustra,  e neishi di MEP na Finanza lo sigui cu su trabau di deshaci di documentonan. Cual testigo lo bisa di ki aña e documentonan cu ta bay Nationaal Historisch Archief ta?

Deshaci di prueba, mientras ta tene trahadornan ocupa cu huelga ta e plan di Gobierno, despues cu e bom di placa a rementa den man di Nilo!

Aruba ta financieramente destrui y a zink caba, segun informantenan cu a bisa cu e rapport cu Mehran a traha y cu cual a bay priminti Hulanda cu otro aña Aruba tin un situacion financiero den balanza, por bay baki di sushi!

E loke Gobierno Oduber a haci ta increibel y ta bay mas leo cu crea un situacion desastroso pa e pais, manera informantenan a bisa DIARIO. No solamente a caba cu tur entrada di Aruba na forma inexplicabel, pero tambe a afecta e balanza di pago y reservanan internacional. Pesey Gobierno a dicidi di introduci BBO cu ansia, pasobra a kere cu si introduci BBO lo por a scapa e loke tabata visibel for di 2005, ora MEP a gana eleccion sabiendo cu Aruba ta na peliger serio.

Gobierno a kere cu e a haya na BBO, sin Valero, un suma di 90 Miyon extra cu e tabata tin mester pasobra di dia Gobierno Oduber a sinta, nunca el a cera aña sin a gasta mas cu tabata calcula.

BBO a duna Gobierno mucho mas cu el a spera pero e maneho di mentira di Gobierno a haci, cu mester a laga BBO aparenta di ta algo atractivo. Pesey nan mes a cay den e buraco cu nan a coba pa Aruba cu BBO. Nan a afecta economia di Aruba, a haya menos entrada cu nan a spera.

Aña pasa entrada di Gobierno a subi cu solamente 30 Miyon mientras a gasta pa loco sin presupuesto pa un gran parti di aña.

A haci maniobranan pa tene e cifra cu mester a bay presta na banco abau, pero asina mes Gobierno a drenta 2008 cu otro presupuesto cu no por a cera y riba cual tin un falta di 150 Miyon, cu ya a bira 180 miyon si tene cuenta cu loke a pasa cu AZV, cu manera DIARIO ya a mustra tambe tabata maniobra di Gobierno.

Mientras otro aña mester a presenta cu cifranan balanza dilanti Hulanda a base di ehecucion rapport Mehran, Gobierno ta den un desesperacion financiero total a base di casonan di ladronicia, malgastamento di placa, abuso di loke pueblo a entrega na Gobierno den forma di tanto belasting y medida.

Informantenan a bisa DIARIO cu e plan di Gobierno ta, deshaci di pruebanan mas liher posibel pa evita cu un proximo Gobierno por manda Ministronan prison y haciendo uso di e lucha di trahadornan pa indexering, baha mas liher cu pueblo ta spera.

DIARIO ta sigui indaga den e asuntonan aki y mester bisa cu e historia di Gobierno Oduber ta yegando su fin.

                                                                                           Back