Coby Geerman, presidente di UEA a splica:

CONFLICTO Y DISGUSTO FUERTE CERCA TRAHADORNAN DI NV ELMAR 

ORANJESTAD (AAN) – Coby Geerman, presidente di e sindicato Union di Electricistanan Arubano (U.E.A) a elabora den encuentro cu prensa, tocante e malcontento cu tin bao di trahadornan di NV ELMAR.

El a comenta cu berdad tin un disgusto formal den e compania y tur hende tin miedo di papia y di bin afo, y nan a warda te ora sr. Geerman a bin for di exterior y nan a bise kico ta pasando.

Coby Geerman a manda un carta pa e directiva y nan a contesta cu diahuebs nan kier sinta cu e sindicato locual e no a worde acepta pasobra e situacion ta di urgencia.

Nan a manda un carta back dunando e directiva te cu 12’or di ayera como ultimatum y si no resulta nan lo tin awe un reunion extraordinario cu e membresia y di eynan tuma un decision.

No obstante, e sindicato a worde avisa pa e Secretaria cu nan a haya un reunion pa ayera atardi. Locual ta importante cu ta haci e reunion aki bira urgente ta mas of menos cuatro punto di prioridad.

Un di nan, sr. Geerman a bisa, y cu tin e mes disgusta, ta cu e director no a cumpli cu su palabra di sinta cu e sindicato, manera a acorda dia cu el a drenta na ELMAR.

El a expresa cu ora un persona no ta cumpli cu su palabra e desconfianza ta bira mas grandi. “E ora ey bo ta puntra si e persona aki a bin como mucha manda of a bin pa drecha e lugar”, e lider sindical a menciona.

Otro asunto ta cu e persona cu a worde suspendi a ser kita di trabao y mester papia riba e pakico e empleado concerni a worde retira, pakico el a ser suspendi, como tambe pakico a cera e edificio na San Nicolas pasobra tres hende a worde suspendi. E ta haya cu esaki ta un mal maneho pasobra tin otro hendenan cu por ubica akinan.

Tambe ta asina cu NV ELMAR tin scarcedad di personal y Coby Geerman a señala cu semper el a bisa esey.

Fuera di esaki nan kier bin cu contratista den e parti di storing-dienst y el a adverti caba cu e no kier mira esey, pasobra e ta bay trece problema y e situacion ta bay bira peor. Esaki a worde poni preto riba blanco den un planning cual sr. Geerman a coge e papel bire, pa no falta respet, kibre y bente afo.

Segun Geerman e estatuto ta habri pasobra nan ta bisa cu nan ta maneha y nan por, pero e problema ta cu nan a yega na un acuerdo den e CAO cu e no mag. Pesey mes ultimo biaha gerencia y sindicato no por a yega na un acuerdo pa nan firma, pasobra nan no por a bay di acuerdo cu ora tin welga nan ta busca contratista pa haci e trabao y kibra e accion.

Geerman a señala cu el a yega di bisa cu si tabata na otro caminda ta morto ta cay pasobra nan no ta permiti pa ningun otro ta bin kibra e welga. El a bisa cu nan no kier yega asina leu, y si ta algo grandi cu mester kita coriente nan mes ta manda hende pa drecha esey pasobra nan ta responsable. U.E.A ta kere cu e pais aki mester bay dilanti y nan ta para su tras den esaki, sin duda algun, segun sr. Geerman.

Geerman ta kere cu e director a bin cu instruccion. E ta culpa su mes un tiki, pasobra e ta sinti cu e sindicato a lapia un tiki, aunke nan a enfoca hopi riba “friends & family” y riba “no politico”. El a señala cu pa un posicion asina mester pone e persona corecto den e lugar corecto, pasobra ELMAR ta un compania grandi, y no por ta cu nan ta bin cu un persona cu no tin ningun experiencia.

Aworaki tur caminda nan ta exigi pa un persona bira director alomenos diez aña di experiencia pero e director nobo di ELMAR no tin ni un aña di experiencia, segun Coby Geerman. E ta puntra con pa interpreta esaki? Na su opinion e nombramento aki no ta na su lugar!

Back