CHOLLERNAN TA TORTURANDO TUR NEGOSHI NA PLAYA

Hasta oficinanan di Abogado ta haya kiebro y mas kiebro! 

ORANJESTAD (AAN) – Abogado mr. Lejuez a duna comentario tocante locual a sosode diadomingo cu a pasa cu vlamnan grandi a rondona su oficina, y ayera el a topa cu su oficina a worde kibra door di bishita indesea. E abogado a worde puntra con e por traha den un area asina unda hopi drogadicto ambulante ta crea problema.

Abogado mr. Lejuez a contesta cu manera ta conoci, su oficina ta hopi cerca di e shelter, cu ta ubica practicamente den Centro di Playa, den un lugar unda practicamente por mira cu tur e edificionan rond di e shelter ta manera muriendo, birando bashi.

“Mi coleganan cu tabata tin oficina akibanda tambe a bay. Varios negoshi a dicidi di bay y nan no ta bin mas, nos ta den un situacion bastante fastioso akinan. Nan a drenta mi oficina varios biaha caba y e fin di siman aki ta e ultimo biaha cu nan a drenta, kibra dos porta bay paden.

Den pasado nos tabata tin porta di bara di hero, pero como cu no tin practicamente hende cu ta biba mas den Playa, e persona cu ta drenta den bo lugar meymey di anochi tin tur tempo di mundo pa hacie, pasobra ningun hende ta wak ki ta pasando.

Hopi biaha ta e alarma cu bo tin ora cu e zona y nan ta manda patruya for di e central di alarma, e ora ey numa nan ta core bay afo bek”, mr. Lejuez a subraya.

Na su opinion, e problemanan di adictonan den Playa ta birando cada bez mas grave. “Mi no sa si e centro pa adictonan, e shelter cu tin banda di nos akinan, ta yuda den esey. Mi ta kere mas bien cu esey ta causa cu e ta birando mas grave”.

Abogado mr. Lejuez ta haya un bon iniciativa di MAMBO di a bin cu “Adopt an addict”. “Esey ta yuda. Cada siman nos ta haya cu tin casonan den Corte pa pone e personanan aki, cu ayudo di famia, bao curatela pa wak si tin lugar pa nan den e centro, pero manera nos sa e centro ta yen, tin un lista di spera basta largo, pues ta hopi dificil pa haya lugar pa e hendenan aki.

“Husticia tin ta purba tur sorto di manera pa yuda. Nos tin e leynan, pero nos no tin e facilidadnan di forma di un centro unda nan por bay, y esey ta e problema”, segun mr. Chris Lejuez.

.

Back