AZV mester splica e suma grandi cu a keda habri

NEISHI DI MEP NA FINANCIEN A STOP COBRANZA MIYONES!  

*Prome cu papelnan desaparece mester bisa berdad

*No ta caso Maiky so a zink Laboratorio

ORANJESTAD(AAN)— Ni e plan di Algemene Rekenkamer ni mudanza di Financien, ni computer cu a crash, por stroba berdad di bin dilanti.

Cifranan mester bin riba mesa pa pueblo mira cuanto placa Nilo a pone Laboratorio perde, ademas di e ladronicia di 10 Miyon di Maiky. Informenan cu DIARIO ta dispone di dje ta mustra cu Nilo a stop cobranza di laboratorio cu a keda cu un debe enorme, cu AZV a hereda!  Pueblo mester sa unda su Miyones a bay prome cu haci documentonan desaparece of berdad keda scondi.

 Placa perdi na otro departamentonan ta keda desconoci! E neishi di MEP na Financien ta responsabel!  Ni e plan di Algemene Rekenkamer, cu ta sconde tras di loke a pasa na Hulanda no por yuda, pasobra DIARIO lo rementa e plan ey tambe! Algemene Rekenkamer mester splica pakico mescos cu Centrale Accountantsdienst el a laga placa di pueblo bay! 

Mientras Nilo ta bisa cu no tin placa, e mester bisa pueblo cuanto Miyones di pueblo nunca a drenta caha di Gobierno pa medio di e maneho cu el a introduci.

Na un departamento chikito manera esun di Laboratorio so, no unicamente Maiky a horta Miyones y Miyones, pero mes Nilo Swaen cu no kier coba buraco pa Aruba awe door di paga ambtenaarnan, a stop cobranza di Miyones, cu AZV a keda sin haya!  AZV mester bisa si ta berdad of no cu tin Miyones di cobranza cu mester a bay pe di Laboratorio, pero cu Nilo na 2002 a stop di cobra.

Mas y mas prueba ta sostene e punto di salida di DIARIO, cu Gobierno Oduber a usa cortinanan di huma pa goberna manera nan tabata kier y awor ta crea otro cortina di huma pa e busca salida.

Investigando kico a pasa na Laboratorio so, cu ta un departamento masha chikito, por nota cuanto placa di Aruba a bira victima di abuso.

Ora Gobierno Oduber a sinta, a dicidi di manda tur hende cu tabata hole AVP den Financien cas. A cuminza cu Roly Sint Jago, cu tabata Director. A sigui cu Arien Albertsz. Despues a sigui cu tur e trahadornan cu AVP a tuma riba base di contrato pa scapa sumanan enorme di placa, cu den pasado nunca a worde cobra, manera na Laboratorio.

Aparentemente tabata Tico Croes cu a pone un grupo di hende traha riba cobranzanan atrasa di Laboratorio y otro departamentonan. Na 2002, Nilo Swaen a dicidi cu e grupo aki mester bay cas.

E personanan aki a bay Huez. Nan a perde a base di mentira cu e neishi di MEP na Financien a trece dilanti. A bisa Huez cu e personanan aki no tabata riba presupuesto y pesey mester kita nan, mientras nan tabata riba presupuesto!  Huez mester a bay tras di e direccion di Financien y a permiti pa kita nan.

E grupo cu Nilo a kita di trabao, tabata traha riba cobranza di placa cu cantidad di hende, entre otro un ruman di Nel Oduber, tabata debe. Tabata alcanza areglo di pago cu hendenan.

Ora a kita e hendenan di trabao a stop cobranza di placa atrasa di entre otro Laboratorio. A dicidi cu administracion di laboratorio ta encarga su mes cu esey y Miyones a keda sin drenta y te awe ta placa cu nunca Aruba a cobra y cu aparentemente lo no cobra mas tampoco.

Abuso a worde haci cu placa di pueblo y pesey mester trata tur cifra debidamente, mientras no por deshaci di ningun documento pa no socede manera e caso Rijbewijs!

DIARIO ta keda tras di e asuntonan aki, pasobra nunca instancianan imparcial a atende nan manera mester tabata y coregi loke tabata pasa.