NOTICIA INTERNACIONAL III

Candidato comunista pa eleccionnan di Nepal a wordo asesina

E candidato di un partido di izquierda na e eleccionnan di 10 di April na Nepal a wordo asesina cu tiro pa hombernan no identifica, segun polis.

Rishi Prasad Sharma "a muri como consecuencia di su heridanan na momento cu e tabata na caminda pa un hospital cercano", segun e superintendente di polis Ram Kumar Janal.

Sharma tabata candidato di e Partido Comunista di Nepal (marxista-leninista) pa e eleccion di diahuebs, di cual mester a dicidi e composicion di un asamblea constituyente.

E eleccion aki lo determina e futuro politico di e pais himalayo y probablemente lo pone fin na e ultimo monarkia hindu.

Controversia riba posible compra di avion y speedboat brasilero na Guatemala

Gruponan pro derecho humano di Guatemala a critica ayera e intencion di gobierno di adkiri seis avion y 10 speedboat brasilero pa combati narcotrafico y crimen organiza pa motibo, evidencia di un remilitarizacion di e pais.

Asina mes nan ta kere cu e pais lo contrae un debe miyonario, y lo pone den peliger e seguridad social, manera educacion, salud y alimentacion, y lo genera mas pobreza, cu ya ta afecta mas di 50% di e 13 miyon di habitante.

"Ta un eror grave cu e presidente ta cometiendo, den sentido cu nan lo trece mas debe pa e pais y un remilitarizacion. E Forzanan Arma ta birando mas fuerte no solamente den equipo, sino den recurso economico", segun e director di e grupo humanitario Grupo di Apoyo Mutuo, Mario Polanco.

E presidente Alvaro Colom a anuncia dialuna, despues di su bishita di tres dia na Brasil, e posibilidad di cumpra prome cu Mei proximo por lo menos seis avion di patruyahe y 10 speedboat brasilero pa combati narcotrafico y crimen organizado. 

Back