NOTICIA INTERNACIONAL II

Ahmadinejad ta acusa Merca di usa 11 di September como pretexto

E presidente irani Mahmud Ahmadinejad a acusa ayera Merca di usa e atentadonan di 11 di September di 2001 como un "pretexto" pa ataca Afganistan y Iraq.

"Cu e pretexto di e incidente un gran operativo militar a tuma lugar y e Afganistan a wordo ataca. Miles y miles di persona a muri te awo", segun un discurso televisa.

"Iraq a wordo ataca. Segun cifranan oficial", el a agrega, "un miyon di persona a muri".

Ahmadinejad kier a pone den duda e version oficial di e atentadonan na Merca afirmando cu e nombernan di e victimanan "nunca a wordo publica".

E presidente irani tambe a puntra con por ta posible cu e sistemanan di radar avanza di inteligencia no a detecta e avionnan prome cu nan a impacta e Twin Towers na New York.

Al Qaeda ta alega cu Viena ta responsable di e suerte di e rehennan austriaco

E braza di Al Qaeda na Magreb a afirma cu Viena ta responsable di e suerte di su dos rehen austriaco, y a exigi e liberacion di un pareha islamista encarcela na Austria y e retirada militar di e pais aki for di Afganistan, den un comunicado publica dialuna.

E comunicado a wordo difundi su siguiente dia di e expiracion di un ultimatum nobo.

"Muyahidine a renuncia durante su ultimatum na su reivindicacion inicial, ya cu Austria a pretende cu su realizacion tabata sobrepasa su podernan", segun e grupo den un texto riba e website islamista, uza generalmente door di e red di Osama Bin Laden.

Wolfgang Ebner, di 51 aña, y su compañero Andrea Kloiber, di 44, procedente di region di Salzburgo (norte), a wordo declara desapareci dia 22 di Februari, den zuid di Tunisia abordo di un vehiculo 4X4 cu matricula di Austria.

Su secuestro a wordo reivindica dia 10 di Maart door di Al Qaida na Magreb islamico.

  Back