NOTICIA INTERNACIONAL I   

Petraeus a pidi pa un paro di retirada mericano for di Iraq

    E general mericano David Petraeus a recomenda ayera na Washington pa pone un paro durante 45 dia, cuminsando na Juli, di un retirada di e tropanan mericano for di Iraq.

"Mi ta recomenda na mi cadena di mando pa sigui cu e retiro di e brigada di combate manda como refuerzo y cu na e termino di e retiro di esaki (cinco) brigada na Juli, nos lo cuminsa un periodo di 45 dia di evaluacion y consolidacion", segun Petraeus den Congreso mericano.

"Na final di e periodo aki, nos lo cuminsa cu un examen di e condicionnan riba tereno, cu fin di determina den ki momento nos por recomenda reduccion nobo" di e contingente mericano, a agrega e militar norteamericano di rango mas halto na Iraq.

E tambe a bisa cu Iran ta hunga un rol "destructivo" na Iraq, especialmente di apoya e milicia chiita, el a duna di conoce na e comision di Senado norteamericano.

E refuerzonan militar mericano a permiti avancenan "substancial" den seguridad na Iraq, pero e situacion ta "reversible", loke ta exigi e prolongacion di e involucramento mericano, segun e embahador di Merca na Bagdad, Ryan Crocker.

E contingente mericano na Iraq ta di actualmente 158.000 homber. Prome cu Juli e number lo cay na 140.000 soldad, kiermen 10.000 mas cu cuminsamento di 2007.

David Petraeus y Ryan Crocker a papia dilanti di e candidatonan presidencial mericano November. E candidatonan democrata Hillary Clinton y Barack Obama a reitera den e biaha aki su criticanan di e guera na Iraq y a reclama e retiro di e tropanan.

Casi 39.000 vehiculo no a core na Honduras pa spar Petroleo

Un total di 38.984 vehiculo a keda sin subi caya den weekend y dialuna na Honduras pa cumpli cu e decision di gobierno di restringi un dia den siman pa auto, cu fin di baha e gasto petrolero, segun fuentenan oficial.

E hefe di e Direccion Ehecutivo di Ingreso (DEI), Armando Sarmiento, a declara cu diasabra nan a registra 228.260 vehiculo, y cu dialuna no a circula e 17%, kiermen un cantidad di 38.640 auto.

E propietarionan di e vehiculonan inclui den e restriccion mester tin un sticker di e dia cu nan no por subi caya, e condena si nan dicidi di haci esaki lo ta di 39,79 dolar.

E meta di e autoridadnan tabata pa registra 350.000 vehiculo di un parke di 650.000, pa motibo cu ta keda exclui for di e prohibicion e vehiculonan di transporte publico, esnan di trabao, militar, polis, ayudo y di cuerpo diplomatico.

Honduras ta consume por lo menos 17 miyon di bari di petroleo pa aña, valora na 1.300 miyon di dolar, pero e mayor gasto ta e generacion di electricidad, ya cu 70% ta produci a base di bunker.

Gobierno kier spar e ekivalente na 63 miyon di dolar cu e decreto "Awe no ta circula". 

  Back