Deporte I 

Inscripcionnan a cuminsa na Antraco Innovation Center pa cu e di 48^th Internacional Boulevard Race

ORANJESTAD-  Manera ya tur hende sa, cu e expectativanan pa cu e di 48 edicion di e 10k International Boulevard Race ta uno halto, unda cu bo bai, bo por mira e canado y coredornan ta entrenando duro pa cu e careda grandi aki, cu lo tuma luga diaranson 30 di April benidero, pues ariba Dia di la Reina.

E organisadonan di e careda, esta ARRUWAC, kier a recorda henter e pueblo di Aruba, muy enespecial e amantenan di coremento y canamento, pa tene na cuenta cu e inscripcion y pago pa cu e Boulevard Race ta posibel, solamente na Antraco Innovation Center.

E orario di inscripcion lo ta di dialuna te cu diasabra di 8 am te cu 6 pm y diadomingo di 9 am te cu 1 pm. E distancia lo ta uno di 10 kilometer y e costo pa cu e Boulevard Race lo ta 10 florin pa canadonan y 15 florin pa e coredornan.

Lo bai tin formulario di inscripcion na oficina di IDEFRE, di dialuna te cu diabierna di 8or pa 4or, pero e pago mester ser haci na Antraco Innovation Center.

Mester remarca cu ta tuma solamente e cantidad di 600 inscripcion, pues inscribi tempran pa abo no keda afor di e prestigioso careda aki, forma bo grupo di scol, trabou, famia y conocirnan y bin join un di e caredanan mas exitante y historico di Aruba.

Back