CASTING NACIONAL DI ARUBA MODEL SEARCH A SOBREPASA TUR EXPECTATIVA 

ORANJESTAD (AAN): Aruba henter ta en espera di e comienzo di AMS2008.  Recientemente a tuma lugar e impresionante casting nacional di Aruba Model Search 2008.  Un total di 297 hoben a sa di inscribi pa asina forma parti di e casting nacional.

   E cuerpo di jurado di Aruba Model Search 2008 a sa di pre-seleciona un total di 108 participante pa asina nan ricibi e prome grupo di seminarionan, realisa e prome photo shoot, y tambe forma parti na e prome Mayor casting di AMS2008 pa asina seleciona e grupo oficial di 35 participante femenino y 35 participante masculino cu lo ta esnan pa continua cu e trajectoria di AMS2008.

   E grupo pre-selecioan di participantenan a realisa nan prome photo shoot cu fotografo official di AMS2008 esta Luis Mejia y a ricibi seminarionan di “International Modelling”, “Nutrition & Excercise”, y tambe un tremendo seminario di “Keune y Beauty Team” caminda sigur lo dicidi kendenan tin mester di un “make over”.

   Ya caba nan a ricibi “tools” importante pa asina cuminsa e caminda di progreso y mehoramiento den e ramo di modelahe. 

Awor ta keda completamente na e participantenan kendenan lo progresa y kendenan no !  E cuerpo di jurado sigur lo tin un wowo ariba e desaroyo di e participantenan di AMS2008 pa asina nan mira ken ta keda aden y ken ta bay cas!

   E casting nacional di AMS2008 a resulta di ta un excelente evento di gran nivel y profesionalsimo.  E organizacion sigur por ta sumamente orguyoso di e tremendo logro aki.  AMS2008 ta conta cu un cuerpo di jurado sumamente profesional y equipa pa seleciona e proximo estreyanan di pasarela di nos isla.

   Cedric Frans, un modelo di Aruba cu logronan internacional ta un jurado cu ta pone hopi enfasis ariba disciplina y curpa.

   Paula Ochoa, modelo internacional y directora di arte y fotografia, ta pone bon atencion ariba e progreso di cada joven y ta duna comentarionan directo y honesto.

   Ronchi De Cuba, diseñador di moda y producer di eventonan local y tambe internacional, ta mira e personalidad y gana di cosecha exito di e participantenan,

   Deborah Hellburgh ta e jurado nobo pa cu 2008.  E ta un modelo internacional, a logra obtene un puesto den e top 10 female models na nivel internacional, y a forma parti di diferente proyectonan di moda na Europa.  Ainda Aruba falta conoce e estilo di e jurado aki pa locual ta trata comentarionan di Mayor Castings.

   Andrew Ras, e fuerte y picante jurado di AMS, lo ta back pa e edicion di 2008.  Su comentarionan ta hopi biaha duro pero si honesto. 

ARUBA A HONRA PAREHA HIRSCH COMO HUESPEDNAN DISTINGUI

ORANJESTAD (AAN): Recientemente Aruba Tourism Authority tabata tin e placer pa honra Sr. Curt y Señora Mary Hirsch como huesped distingui pa e isla di Aruba, kende tin mas cu 10 aña bishitando nos isla.

   Señora Nathalie Maduro, PR. Liaison pa Aruba Tourism Authority a haci entrega di e certificado nan den presencia di Señora Izaira Pirela, e representantenan pa Aruba Beach Club y tambe Señora Giel y a gradici tur presente, den nomber di Gobierno di Aruba pa nan sostén pa cu Aruba.

   Nan a keda contento cu e reconocimento aki y a expresa cu di e prome momento cu nan a yega Aruba nan a keda encanta cu nos isla y especialmente cu e hendenan asina amabel y carinoso y pa e motibo aki tambe cu nan a keda bishita nos isla tur aña. Un biaha mas pabien na tur tres famia como tambe na e personal di Aruba Beach Club pa nan excellente trabao.

CirCaribe a habri na Occidental

ORANJESTAD (AAN):  Occidental Grand Aruba ta invita bo pa bishita CirCaribe, un di e hotel su presentacionnan di showroom cu ta tuma luga tur siman den e Grand Ballroom.

   E show cu a caba di habri den fin di siman ultimo ta mas cu un ora largo y ta presenta un celebracion surrealistico di musica y baile, presenta pa acrobatnan y comiconan.

   E show ta un produccion di Fun Club, concebi pa e director talentoso Omar Chavez, cu coreografia di e bailarina creativo, Prima Ballerina Violeta Petrova.

E publico lo disfruta di e oportunidad pa bishita di nobo e circo di nan hubentud, mientras cu e presentadornan lo cana riba glass kibra, juggle candela, cana riba palo halto, cu payasonan purbando di sigui nan y participa, pidiendo miembronan di e publico pa haci mescos.

   Tin angelnan cu lo cai for di cielo, cual ta crea un spectaculo misterioso y magico cu lo duna energia na tur esnan presenta y lo crea un ambiente pa henter e publico disfruta completamente.

   E show a habri dilanti un sala completamente yen y Gerente General di e hotel, Jesus Cardoso a gradici e ekipo cu a pone hunto e miho anochi di entretenimento riba e isla, un show cu a termina cu un cantidad di confetti companja pa clapchi.

Tambe presente y impresiona pa e resultado di e mega produccion tabata Gerente di Casino Wilfred Trimon.

   E anochi ta garantisa pa entretene bo y laga bo babuca! Corda cu e elemento interactivo di e anochi lo por hasta haci cu bo mes ta subi e scenario...Sea bo dicidi di participa of simplemente observa, CirCaribe ta un treat special cu bo no lo kier perde!

ESNAN DI AHATA A "NETWORK IN STYLE" 

ORANJESTAD (AAN): Despues di e conclusion exitoso di e Asamblea General organiza pa e Aruba Hotel & Tourism Association, miembronan di e asociacion y prensa invita a cambia pa un otro zaal, unda nan a disfruta di un fiesta di cocktail refrescante, conoci como "Networking in Style."

E prome Asamblea General di AHATA pa 2008 tabata un experiencia educativo excepcional, cu e ultimo noticia tocante e programanan di e asociacion y informacion nobo di oradornan invita.

E Asamblea General tambe a provee miembronan di AHATA cu un tremendo oportunidad pa network cu coleganan den e industria.

Riba e potretnan por mira algun momento di e evento, mientras cu e ekipo culinario di Renaissance a sirbi pasapalonan delicioso y un sin fin di bebida.