|
|
|
|||||||||||
|
Junior Adi Thijsen tambe ta gosa di placa di pueblo manera Hendrik Croes ADI THIJSEN TA NENGA DI REUNI CU SINDICATONAN DEN ACCION Ex-sindicalista Thijsen awe ta bira lomba pa e lucha sindical ORANJESTAD (AAN) – Dialuna mainta den un reunion den parlamento a surgi un situacion cu sigur e lider di fraccion di MEP a spera cu nunca lo bin. Un carta a yega parlamento di e abogado di Sindicatonan den Accion. For di parti di oposicion, fraccion di AVP a bin cu e sugerencia pa parlamento duna su pensamento y reaccion na e sindicatonan. Lider di e fraccion di mas grandi den oposicion, Mike Eman, a mustra cu e momento ta yega cu tin un responsabilidad pa gobierno den e situacion di crisis aki. Inicialmente por bisa cu sindicato y gobierno mester resolve e problema di indexering, pero manera ta mustra, gobierno no tin interes den dialogo. No por ta asina cu parlamento ta keda para un banda y laga gobierno maltrata trahadornan di e forma cu e ta hasiendo awor aki. Ta na su lugar pa por lo menos Parlamento tin un reaccion ariba e situacion aki. Hunto cu AVP e otro fraccionnan den oposicion, MPA y RED, tambe ta kere cu parlamento mester por duna su opinion den e caso aki. Pero for di fraccion di MEP a bin un reaccion incomprendibel. Hibando palabra for di gobierno, lider di fraccion di MEP, Adi Thijsen atrobe a laga pueblo na caya. Den e caso aki, Adi Thijsen ta laga net e trahadornan publico y di fundacionnan di gobierno cay. E tiki hendenan cu toch por tabata tin un tiki speranza den ex-sindicalista Adi Thijsen mester a keda decepciona atrobe! Adi Thijsen no kier tende nada di papia, reacciona of duna pensamento di parlamento na e sindicalistanan. Hopi ta puntra kico lo por ta e motibo cu atrobe Adi Thijsen ta laga pueblo un banda. E motibo ta uno hopi cla y raspa: Placa. A sali un cantidad di MB (Ministeriele Beschikking) for di Ministerio di Husticia cu ta duna e bufete di abogado di Adi Thijsen un cantidad grandi di casonan di gobierno pa trata. Parce cu ta e placa cu e por cobra di e MB’nan aki, ta loke ta hunga un rol grandi den e cambio di actitud di e ex-sindicalista. Ta fresco den memoria di pueblo con e lider di fraccion di MEP, Thijsen, a defrauda henter pueblo ora cu e la parce di ta para duro pa e irregularidadnan cu e la mustra ariba nan den Ministerionan di Minister Marisol Lopez-Tromp aña pasa. Pa algun siman largo, e parlamentario aki a para duro pa su ponencianan pa cu e actonan irregular di Minister Lopez-Tromp. Despues di algun siman, sin ningun aviso, Adi Thijsen a cambia di opinion 180 grado. Tur hende a keda babuca pa e cambio aki y hopi a cuminsa specula cu mester tabata tin un motibo pa e cambio di opinion aki. E malesa di Hendrik Croes ta parce di a frega su mes ariba Adi Thijsen. Ta parce cu placa grandi lo bay hunga un rol den loke un parlamentario ta hasi den parlamento awor. Esey ta algo inacceptabel, pero ta parce cu placa tin! Aunke cu gobierno ta nenga categoricamente di duna indexering na trahadornan publico, tin placa si pa Hendrik Croes, Ruben Oduber, Walter Oduber y awor tambe Adi Thijsen. E MBnan probablemente ta suma na November 2007 so caba na 50 mil florin pa Adi por fiesta mientras cu pa pueblo no tin placa. Fraccion di MEP a mustra awor, cu nan mayoria den parlamento, cu lo vota contra di cualke intento for di banda di oposicion (AVP, MPA y RED) pa parlamento reacciona ariba e carta aki. Ta parce cu MEP tin su parlamentarionan, y specificamente e lider di fraccion, bou di control. E MB’nan ta hunga un rol grandi den esaki. Lo ta pesey, Edwin Jacobs a core sali for di parlamento? |
|||||||||||
|
|
||||||||||||
|
||||||||||||
