E MINIMO CANTIDAD DI POLIS PA WARDA DI PLAYA MESTER KEDA 7 AGENTE 

ORANJESTAD (AAN): Hefe di Seccion Oranjestad, Sr. De Vries, a mustra riba reunion urgente yama Diasabra atardi, cu pa Playa mester di minimo 1 Wachtcommandant y 6 agente policial.

    El a mustra cu e idea di 1 Wachtcommandant y 2 agente, nunca lo funciona pa Oranjestad!   Tampoco ta acepta 1 Wachtcommandant y 4 agente.

   No ta bay pensa ni un rato riba 1 Wachtcommandant y 2 agente.  E ultimo aki ta peligroso, si acaso tin un asistencia di pelea riba caya, e ora casi e agentenan no por haya ‘back-up’ pa asina controla e pelea.

   Si acaso tin solamente 2 agente riba caya, e ora nan lo no ni bay pa atende pelea, etc.  Pa tal motibo, mester tin minimo 7 agente (1+6) trahando.  E patruyahenan tin di sigui, pasobra hecho ta cu ora cu no tin Polis riba caya... por nota un aumento rapido di kiebro y ladronicia.

   Sentencia di Huez no ta bisa cu tur Polis mag di bay den Welga.  E bunita ta cu Polisnan a demostra cu nan tin disciplina y te ainda nan no a “pone Cuerpo Policial plat”.  Un polis mester tin e responsabilidad pa carga esey, y bo por demostra den e accion kedando tog cu un prestacion minimo na comunidad como Agente Policial.

   Kico lo pasa awe Diamars?  E speranza tey cu Sindicato atene su mes na e palabracionnan, y cu e absoluto minimo ta 1 Wachtcommandant y 3 Agente den distritonan, y 1 Wachtcommandant y 4 agente na Playa.

   Lo tin Polis cu ta bay yuda vigila e Welgistanan, y te cu awor nan ta impresiona con bon disciplina e accion ta canando.  Tur hende ta comporta nan mes bunita.