Automobilistanan mester tene cuenta: 

MAÑAN LO CUMINZA CERA CRUZADA PARIBA DI KUKWISA SCHOOL

ORANJESTAD (AAN) – Señor Bernardo Maduro ta e funcionario di Polis di Trafico, encarga cu ceramento di caminda relaciona cu proyectonan di infrastructura, manera den e caso aki, e turbo rotonde di Pos Chikito.

Den entrevista cu nos redaccion, señor Maduro a splica cu diaranzon awor lo cuminza cera e cruzada pariba di Kukwisa School. E caminda principal ta keda habri y e trafico lo sigui circula normal, pasobra ainda nan no ta cla pa cera esaki.

Pero e automobilistanan cu ta uza e camindanan patras mester tene cuenta cu nan lo worde desvia y cu nan no por pasa riba e cruzada di Kukwisa School den horarionan di trabao. Segun e compania nan lo haci e trabao den oranan di mainta y despues di 4’or pa 4.30’or di atardi e caminda lo worde habri.

E cruzada grandi tin planea pa cere dia 4 di Mei, y e trafico lo worde desvia for di e di dos cruzada di Pos Chikito bayendo di San Nicolas pa Oranjestad, y tambe lo desvia e trafico biniendo di Playa pa San Nicolas, for di e cruzada di drive inn caba.

Maduro a agrega cu manera e automobilistanan por a ripara caba, a worde traha un caminda pa entrada y salida cla caba na Pos Chikito, pa evita mas trafico posible riba e brug bieu.

E funcionario policial ta pidi e automobilistanan comprension y pasenshi, pasobra e no ta facil pero e ta un situacion cu mester siña biba cune temporalmente, pero asina cu e rotonde keda cla e problema lo no tey mas pero lo tin un mehor fluho di trafico na Pos Chikito, ya cu e sistema aki ta e mehor solucion pa e caminda aki.