Comportacion bochornoso di nos mandatarionan! 

ORANJESTAD(AAN):Nos por mira con maestro di scol tur dia ta haya nan mes ta fungi como mediador.

Purbando di haci e muchanan conciente riba nan comportacion pa cu otro, splicando nan cu e palabranan sabio ta bisa: no hasi cu otro loke bo no kier nan hasi cubo.

Kiermen no tenta otro, no dal otro, pero respeta otro. Hasta nos por corda cu un instancia hopi conoci aki na Aruba a yega di haci un campaña “man no ta pa dal”

Dia aden dia afo nos por lesa, mira y scucha den medionan di comunicacion con violencia ta cabando cu nos hubentud, gang aki gang aya, tur hende ta haciendo nan maximo esfuerzo pa caba cu e mala racha aki. Nos por corda cu den pasado tabata tin programanan pa concientiza nos hobennan riba nan comportacion manera “Let’s Talk” y asina por sigui menciona mas.

Minister presidente Sr. Nelson Orlando Oduber……..

Ora cu bo a kere cu un hende cu tin e investidura aki, esta di ta e prome minister di un pais, lo sa miho y lo trata na trece un solucion na e problema cu a surgi entre gobierno y sindicatonan, ta pasa net lo contrario.

 E ta bay yama su militancia, e ta yama su “gang” pa bin enfrenta trahadornan cu ta luchando pa nan derecho ! Ki berguensa ora bo scucha un persona, cu mester sa miho, expresa den e forma cu e prome minister di e pais aki a expresa su mes.

Ora e ta bisa cu e ta kita su pechi di prome minister y ta bisti esun di lider di partido M.E.P. Mal Ehempel Pa Pueblo. Wel Sr Oduber, si bo kier kita bo pechi di minister president di Aruba bo mester ta na su excelencia Gobernador di Aruba, y no na e radio na Sta Cruz !

Hyacinto Rudy Croes…...

Otro berguensa mas ora cu autoridad tabata haci su trabao investigando ta kico lo por a pasa cu un ruman di e minister en cuestion cu lo tabata den un problema di un caso di “hit and run”.

Tur hende por a scucha e minister aki na un radio emisora insultando y menasando tur hende cu si su ruman no sali liber algo grandi lo bay pasa aki na Aruba. Bisa nos ta con nos lo por splica nos hubentud cu mester tin respet pa autoridad si esnan prome yama pa cumpli cu e deber aki ta e promenan cu ta rebeldia y bay over na menaza nos autoridad.

Candelario “Booshi”Wever…...

Un huez ta duna su veredicto encuanto e comportacion di minister Wever dilanti di nos aeropuerto internacional, caminda cu e minister lo a maltrata un ciudadano, anto minister Wever ta sali afo y bisa cu si e situacion presenta un biaha mas e lo bolbe actua di e mesun forma. Kiermeen e persona aki ta di opinion cu no tin ley cu ta conta p’e. Cu e ta para riba tur cos.

Esaki ta e actitud di e gobernantenan cu ta manehando e pais aki. Un set di hende cu no tin respet pa ningun hende, sigur no pa esnan cu no ta pensa mescos cu nan.

Nan, cu mester ta “role model” pa nos futuro generacion. Ta unda nos pais ta bai ? Un set di gai di pelea ta gobernando e pais aki keriendo cu haciendo uso di menasa y intimidacion nan por keda domina e pueblo aki.

Un berguensa di marca mayor pa nos pais Aruba.