Den cuadro di Dia Mundial di Salud: 

DEPARTAMENTO DI SALUD TA ORGANIZA CAMINATA DI 5 KM NA GRAPEFIELD

ORANJESTAD (AAN):  Dia 7 di April ta Dia Mundial di Salud. Den cuadro di esaki, Departamento di Salud Publico a tene un rueda di prensa pa duna di conoce cu nana actividadnan relaciona cu e dia aki.

 Sr. Gregory Fung-A-Fat, Hefe di Departamento di Planeamento y Informacion a expresa cu e siman aki di parti di Pan-American Health Organization (PAHO) y World Health Organization (WHO) a wordo dedica pa un siman di salud.

  A manifesta cu e aña aki e topico ta enfoca riba e proteccion di nos salud y e cambionan den clima, “Protecting health from climate change”.

  Na Aruba, Departamento di Salud tin varios actividad planea. E siman aki tin un par di topico cu lo sali den corant riba e topico aki di cambio di clima y salud.  Banda d esaki, nan tin organiza un caminata cu lo tuma lugar dia 9 di April na Grapefield, San Nicolas pa 5:30 pm.

  Pa a actividad aki, segun Fung-A-Fat, tur hende ta wordo invita pa e Funwalk aki y asina disfruta di e naturaleza, aire fresco y un paisahe bunita.

  Pa e ocasion aki a diseña un franel cu e logo nobo di DESPA y patras nan a pone algun dibuho cu diferente tipo di movecionnan y cu e lema: ‘Move pa Salud’, a bisa.

  A reitera cu e caminata aki lo tuma lugar diaranzon 9 di April na Grapefield na altura di Boca Grandi. E lo tin un distancia di 5 kilometer caminda lo tin un t-shit y awa pa tur esnan cu participa.

  Pa informacion y inscripcion pa yama Seccion di Informacion di Departamento di Salud, telefon 522-4200 y puntra pa Judith of Truus.  Tambe por inscribi na IDEFRE of djis yega Diaranzon na Grapefield.  E ta gratis.