Cu gobierno mester sinta na mesa cu sindicatonan den accion: 

GREGORIO WOLFF TA EXHORTA CUATRO PARLAMENTARIO DI MEP PA HONRA LOKE NAN A EXPRESA! 

ORANJESTAD (AAN) – Gregorio Wolff, Secretario di Formacion di Sindicato di Empleadonan Publico y Priva (SEPPA) a exhorta e cuatro sindicalistanan di MEP cu tanto a vocifera e dianan aki, cu gobierno mester sinta na mesa cu SdA, pa honra loke nan a expresa.

Asina aki Wolff a bisa den su comentario, den entrevista cu nos redaccion, relaciona cu e ultimo desaroyonan di e lucha di trahadornan di gobierno, pa loke ta trata indexering.

Wolff ta mira e situacion como uno dificil y fastioso cu ta yegando su climax, unda cu por mira cu e sindicatonan a manda pidi gobierno pa sinta na mesa, despues di e veredicto di Huez siman pasa, pero gobierno ta terco y e no kier sinta cu nan.

E sindicalista a manda un mensahe pa e Parlamentarionan di MEP: Dumpries, Thijzen, Daniel Leo y Robert Maduro cu ultimo dianan a bisa cu partidonan mester sinta na mesa.

“Pues aworaki nan mester duna nan palabranan balor y bisa gobierno pa sinta na mesa y busca solucion. Pasobra manera nos ta papia den e vocabulario di custumber Arubiano, un homber mester duna balor na su palabra. Y den e caso di e cuatro parlamentarionan aki cu ta grita masha hopi mes cu gobierno mester sinta na mesa, y aworaki no ta actua, claramente ta mustra cu nan como homber no ta duna e balor na e palabranan cu nan a expresa”, segun Gregorio Wolff.

E ta spera cu di parti di gobierno, den e dianan aki lo sali un invitacion pa e partidonan sinta na mesa y haya otro, pa e situacion no bay for di man, ya cu ayera cu awe tur departamento por welga, y despues ta bin dos dia di sosiego y despues tur departamento por bolbe welga durante tres dia.

“Kiermen e situacion ta bay den un climax, y mi ta kere cu ni di pueblo, gobierno ni sindicato kier bay den e climax aki. Y e palabra ta na gobierno y na e parlamentarionan cu tanto ta grita cu partidonan mester sinta na mesa”, Gregorio Wolff a reitera.

Back