No tin fecha official ainda pa dera famia Lampe… 

EUGENE GIANCARLO LAMPE A ADMITI SU CULPABILIDAD

Ayeranochi e curpanan a ser entrega na famia….

ORANJESTAD(AAN):Ayeranochi e curpanan sin bida a ser entrega na famia.

For di trempan dialuna mainta DIARIO tabata tin contacto cu fiscal mayor Hans Moss kende a splica cu e ta pendiente pa e resultado di e autopsia pa asina yama un conferencia di prensa hunto cu mando policial.

Esey a sosode tambe dialuna atardi na Sta Cruz den cantine di Centro di husticia.

Aki alto comisario Peter de Witte y tambe Fiscal Mayor Hans Moss mes a bin splica prensa kico a pasa. Tur cos ta mustra cu e sospechoso Eugene Giancarlo Lampe a admiti cu el a mata su mama, tata y ruman homber.

Tambe cu el a haci esaki separadamente unda den e prome camber di e cas tabata tin tres curpa benta abao y tur tabata mustra di no tabata duna señal di bida pero si marcanan fuerte di golpi.

A haya curpa cu carbon riba dje y kima mientras cu tabata tin plas di sanger den henter e camber segun alto comisario Peter de Witte.

E golpinan fuerte tabata bisto riba cabez di cada victima.

Algun hende cu a drenta e cas a logra paga e candela cu tabata tin e momento ey segun informacion cu autoridadnan a duna.

Te mesun hendenan aki a bati alarma tambe y bisa cu tin hende kima den cas sin pensa cu ta trata di un crimen horendo.

Eugene Giancarlo Lampe cu ta e yiu mas chikito di e famia mes a yega meld su mes na warda di polis na Sta Cruz.

Fiscal Lugo a duna orden mesora pa detene Eugene Giancarlo Lampe mientras cu a haci un investigacion den henter e cas na Macuarima 27-C pa logra haya tur e pruebanan necesario den e caso aki.

Fiscal mayor Hans Moss a splica cu diasabra caba a cuminsa cu e interogacion di e sospechoso Eugene Lampe y tur e interogacion ta bay a base di un grabacion cu camara y audio. Segun fiscal mayor Hans Moss cada asesinato a tuma lugar riba mesun dia, pero cada uno den oranan separa. E asesinato a tuma lugar entre 8’or di mainta y 2’or di merdia. Pa 2’or di merdia henter e famia tabata asesina caba.

Lo bay tin reconstruccion y ya caba por confirma cu aki e agresor a usa un arma unda a golpea su victimanan pa asesina nan.

E motibo di e incendio segun ministerio publico tabata pasobra cu e kier a deshaci di e pruebanan di e asesinato cruel cu el a caba di comete.

Fiscal mayor Hans Moss a splica cu ultimo añanan mester paga tino cu declaracion di sospechosonan cu ta core admiti nan culpabilidad pasobra mester investiga y busca sosten pa e declaracionnan a base di pruebanan busca den e investigacion.

Awe e sospechoso ta ser presenta dilanti di huez comisario pa atende cu su detencion.

Informacion cu DIARIO tin ta bisa cu huez comisario mes lo bay warda di Sta Cruz pa papia cune.