Segun sr. Alfonso Geerlings:

 GOBIERNO KIER PA PENSIONADONAN

MURI PA NAN KEDA CU NAN PENSION

ORANJESTAD (AAN) – Minister di Finanza y Economia kier kita e compensacion conoci como “Duurte Toeslag” for di e pensionadonan di sector publico.

Asina señor Alfonso Geerlings, ken tabata den e marcha di protesta ayera, a menciona den entrevista cu nos redaccion.

Geerlings a sali cu un borchi unda e ta demostra cuanto su pension ta actualmente, despues cu el a traha casi 23 aña como maestro di school y cu el a paga pa su pension.

El a splica cu actualmente e tin un “Pensioengrondslag” (basico) di fls.381,50.

For di aña 1966 cu el a baha cu pension te cu aworaki 2008 el a keda mescos. Pero gobierno tin e derecho di kita e compensacion cualkier momento manera nan kier haci aworaki.

Na e momentonan aki cu e tin 32 aña pensiona y cu den e transcurso di añanan te aworaki e “duurtetoeslag” a crece di como 800 florin te cu 2.300 florin, si gobierno ta kita esaki e ta keda cu fls. 381,50 y su pregunta ta con e ta bay sobrevivi cu e suma aki?

Gobierno, el a bisa, no ta worry cu e pensionado ta na bida, pero nan kier pa e muri pa nan keda cu su pension.

Tocante e cuido medico, sr. Geerlings a comenta cu e ta pagando 240 florin pa AZV, cada luna. El a conta cu recientemente su señora a haya dolor di lomba y AZV a bise cu nan no ta paga e 200 florin pa scan. E mes mester a pague y a resulta cu su señora tin arteriosclerosis.

E ta haya cu si e ta pagando 240 florin cada luna pa AZV cu ta 10% di su pension, pasobra gobierno ta bisa cu e no ta su doño di trabao mas, y como tal nan tin cu paga 100% nan seguro di cuido medico. Y pa colmo nan tin cu bay paga eingenbedrage tambe. Sr. Geerlings ta haya cu “gobierno ta loco” pasobra e situacion pa e pensionadonan ta hopi dificil y tur cos ta sumamente caro manera nunca antes el a mira den nos pais.

E no ta compronde con gobernantenan si ta gana un monton di placa y ta haya pension ya cu 40 aña, y esey e ta haya mucho sinverguenza.

                                                                                                                      Back