SUCESONAN    

DOS ROTTWEILER A ATACA DEN MADRUGA 

ORANJESTAD (AAN): Tabata Diadomingo marduga, cu Polis a bay den Scibillostraat pa atende un caso di dos cacho Rottweiler cu tabata habraca un cacho crioyo.

   Polis a presenta na e cas y e doņo cas a indica e agentenan su cacho sin bida color maron bao di sanger.

   Agentenan a constata enberdad e cacho asina yama caya no ta na bida mas. Despues cu polis a scucha e version y a observa e cacho morto, agentenan a acerca e doņo di e dos Rottweiler.

   E doņo di Rottweiler a worde atendi pa loke su cachonan a comete. Doņo a mustra comprension pa e sucedido y el a priminti pa tene su cachonan mara.

   E cacho sin bida sea lo worde hiba dump, of santana di cacho pa dera. 

HOMBER CU COMPORTACION RARO BANDA DI COSTA DI LAMAN 

ORANJESTAD (AAN): Diadomingo atardi den careda di 5’or, Central di Polis a ricibi informe cu na costa panort, den area  pabao di Capel Alto Vista tin un homber di edad sinta riba baranca.

  Testigonan a mira cu banda di e homber lo tin un mucha chikito sinta mara.

   E homber califica como bieu lo ta maneha un vehiculo Hyundai color blanco. Number di e auto a worde suministra tambe na Polis.

   E patruya cu a worde dirigi na e lugar indica na yegada nan no a localiza ni e vehiculo modelo Van y tampoco e homber di edad cu e mucha chikito.

   Polis a busca den vecindario pero tampoco a logra localiza ningun alma. 

Pa horta cartera y celular... 

CHOLLER A ATACA VICTIMA CU MOKETE 

ORANJESTAD (AAN): E tantisimo chollernan cu ta circula sea den dia, anochi marduga ta keto bay ta causando problema muy en particular den centro di Oranjestad.

   Diadomingo anochi pa ser exacto 9:30’or, e homber di inicialnan P.R. di 59 aņa a bira e  di tantisimo victima di choller.

   Hunto cu un testigo masculino, e victima a presenta na warda di Oranjestad. E testigo a declara na polis cu el a wak con un choller a dal e victima mokete den cara y despues a core bay.

   Debi na esey, e victima a worde roba di su celular y su cartera. Segun descripcion, e choller ta bisti cu T-shirt, jeans y petchi color berde cu blanco, su color di cuero ta cla y cu postura delega.

   Polis a patruya den centro di Playa y vecindario sin resultado. 

CHOFER A DAL OTRO UN MOKETE 

ORANJESTAD (AAN): Tabata casi 6’or di mainta, cu den Caya Ernesto Petronia e chofer di un Ford Explorer color shinishi maneha pa e homber naci na Colombia di inicialnan D.A.J.T. di 20 aņa di edad, a dal tras di un Toyota color blanco.

   E chofer colombiano segun e relato policial ta bao influencia di alcohol. Despues di e acto e chofer colombiano kier a core bay, pero chofer di e Toyota, esta e homber di inicialnan P.I.L. a logra dal D.A.J.T. un mokete den cara.

   Consecuentemente e hoben Colombiano a perde control y a bay dal den un palo di luz.

   Polis a presenta y nan a detene sospechoso D.A.J.T., y el a worde hiba Warda di Polis.

   Na Warda di Polis a pone e sospechoso supla y a resulta cu grado di alcohol a midi hopi halto (8.30).

   Polis a traha verbaal y e procedimento den e caso aki a continua. 

HOMBER A WORDE HINCA NA VARIOS LUGAR 

ORANJESTAD (AAN): Diadomingo na altura di Piet’s den Caya Ernesto Petronia, polisnan a localiza e un homber cu a ricibi varios hinca.

   Ta trata aki di un homber naci na Colombia di inicialnan G.A.V.G. di 25 aņa. E victima tin hinca na parti di su braza robez y tambe na su heup robez.

   Pero a keda constata cu e compai aki ta fuertemente bao influencia. Consecuentemente e no por a splica polisnan kico a pasa, con bini e tin e dos hinca nan y kende a comete e acto.

   Polis a pidi presence di ambulans pa transporta e victima horacio Oduber Hospital. Investigacion di parti di Recherché lo continua pa saca afor kico a tuma lugar. 

                                                                                                                              Back