CANDELA DI MONDI GRANDI NA HOOIBERG A PERCURA PA INTRANKILIDAD DI E HABITANTENAN 

ORANJESTAD (AAN) – Un candela di mondi manera cu e ta wordo yama den boca di pueblo, a percura pa molestia y spanta e habitantenan di Hooiberg, ya cu e candela no solamente tabata menaza diferente cas pa cende nan esakinan tambe na candela, pero a percura pa un intrankilidad tremendo pa cu e habitantenan.

Bo por imaginabo mes net na momento cu bo ta core yega cas pa come algo prome cu bolbe regresa trabou, diripiente esaki ta wordo stroba pa un candela di mondi cu ta origina muy probablemente pa boternan tira den e mondi y cu tur e solo cayente cu tin ata azota Aruba den dianan aki ta percura pa cende e mondi na candela of pa mannan manda cu no por para keto y ta bay cende mondinan na candela.

Pa colmo cu durante cu e bomberonan tabata combati e candela grandi aki, tabata tin asina tanto material den e caminda di e candela, cu ela haya mas forza segun cu e tabata ariba su recorida.

Habitantenan cu cups, hemchi y slang den man tabata purba di wanta e candela mas tanto posible. Na algun caminda nos por a tuma nota con algun di nos matanan stima manera e kibra hacha, tabata kima sin piedad.

 Na un cas cu tin apartamentonan den cura, nos por a wak con teasta e meter di awa a kima di tal forma cu esaki tabata spuit awa pa su cuenta.

Claro cu e cuenta di awa ta bay pa esun cu tin e apartamento na cual e meter ta pertenece. Habitantenan tabata carga canica di awa hiba pa e bomberonan cu tabata bringa e candela na ordo di dia.

Back