UN POTRET TA ALGO HOPI IMPORTANTE 

ORANJESTAD(AAN): Recientemente a tuma lugar un conferencia di prensa na Imelda Kleuterschool di Checkpoint Color, relaciona cu un proyecto yama: ”E potret cu a bay school”.

Intencion di e proyecto tabata pa mustra e rol di potret den educacion moderno, como tambe e balor di e potret di school den famia.Durante e conferencia di prensa a wordo splica e nificacion di ‘E potret cua bay school’.

Pa haya sa pakico ta un hopi bon noticia cu e potret a bay school, a mustra riba un mal noticia.

E mal noticia ta cu maske e generacion actual tin mas hopi camera cu cualkier otro generacion desde cu a inventa fotografia, e generacion aki ta e generacion den cual menos ta print potret.

E mesun ventaha di e camera digital cu ta laga nos saca cuanto potret cu nos kier y wak nan mesora, tambe ta su limitacion.Pasobra una vez cu nos a wak e potretnan, nos tin e mesun necesidad di print nan.

Despues cu nos a wak nan nos ta warda nan, pensando cu un dia den futuro nos lo print nan.Sinembargo mirando cu nos tin miles di potret warda, e placa nunca lo yega pa nos print tur.

Eynan e potretnan ta keda y e posibilidad tey cu un dia nos computer ta crash of ta haya un virus, cu ta causa cu nos ta perde tur e potretnan, pues tur e recuerdonan precioso di henter un bida.

 E potret mas y mas a bira un medio importante pa hasi enseñanza mas visual, comprendibel y personal.Potret a bira central den ‘spreekbeurt’, of den proyectonan social.

E potret ta hasi posibel pa e mucha hasi su proyecto mas bibo, cu mas color y un refleho di e comunidad cu e ta biba aden.

E proyecto yama ‘Mi Potret Cultural’ ta pone e mucha investiga e historia di su famia y asina haya sa mas di su famia, cu e mayornan mes tin biaha.

Hopi biaha ta tristo pa ripara cu e potretnan di school ta e unico potretnan geprint cu tin di e mucha, mientras e potret aki no ta haya mes atencion cu antes tabata e caso.E potret ta wordo warda den un lachi.

Esaki no ta wordo hasi cu mal intencion, sino tempo no ta duna mas pa sinta hasi cos gezellig, traha un album hunto, of cumpra un leishi pa pone e potretnan aden.

Den bida di e mucha e aprecio, e aceptacion y e amor cu e mucha ta haya, ta asina importante pa su sentido di balor propio.

Durante e conferencia di prensa a wordo bisa tambe cu tin biaha ta bon pa nos para keto y realiza cu momentonan den bida no ta bin bek.

Nos por cumpra hopi cos cu placa, pero nos no por cumpra tempo.Nos no por bay bek na u graduacion di kleuterschool, di MAVO, HAVO of VWO.

Hopi di nos ta encontra otro awendia atravez di Facebook, maske nos ta na diferente parti di mundo.Tin hende ta forma grupo online di e hendenan di nan klas di antes.

E potret di school akinan ta trece bek e memorianan di e cosnan tempo nos tabata chikito, e cosnan pret, e cosnan di bida.Den tur esaki e potret ta hunga un rol central.Bida ta pasa bay, pero e potret ta keda.

Potret di Checkpoint Color ta su entrada, pero e ta tambe nan pasion y pesey nan ta haya importante pa stimula hende pa semper ta pendiente di e balor di e potret pa historia di nan famia y pa e balor propio di e mucha.

Checkpoint a duna un danki tambe pa e confianza di henter aña, duna pa tur school y mayor.Riba e mesun dia, Checkpoint Color a entrega dos premio.Un laptop a bay pa un di e ‘supermodelnan’ di school cu ta Shadrock Erasmus y juffrouw Sonia Goes a gana un weekend stay.   

Back