DEPORTE I 

Washington Taekwondo Center a sobresali den e torneo di Aruba Taekwondo Bond

ORANJESTAD(AAN)---  Diasabra ultimo Washington Taekwondo Center a participa den e torneo di Taekwondo  organisa pa Aruba Taekwondo Bond.

Directiva di Washington Taekwondo Center a keda masha contento cu e resultado. Den e torneo di Aruba Taekwondo Bond, Washington Taekwondo Center a manda 4 alumno pa competi.

E resultado tabata cu for di e cuater alumno cu participa 3 a gana promer lugar y a ricibi medalla di oro y un a resulta na segundo lugar y a haya medalla di plata.

E alumno nan cu gana promer lugar y a haya medalla di oro ta: Aishwar Kelly di apenas 4 aña y sigui pa Maikel Sanchez di 8 aña cu medalla di oro y tambe Ashley Reyes di 11 aña a gana medalla di oro.

I por ultimo Byron Reyes di 13 aña a gana segundo lugar y a haya su medalla di plata. Mester remarca cu Washington Taekwondo Center casi semper ta logra posicion halto den Taekwondo.

Den e torneo pasa Washington Taekwondo Center a haya e trofeo di Best Female Fighter.  Master Rey Kelly y Kyobonim Castro Perez a keda masha satisfecho cu e resultado.

Washington Taekwondo Center ta localisa den e gymzaal di Scol Basico Washington, y tin les tur diamars y diahuebs for 6:00 p.m. pa 7:00 p.m.

Back