• Un saludo cordial na mi lectornan, danki di antemano pa lesa mi columna di Clabo ta saca Clabo.

•  

• Bueno, ta parce cu e guera di MEP vs. integrantenan di MPA ta intensificando.  Despues cu Renato van Putten a divulga hopi informe valioso encuanto MEP y tambe e medidanan di AZV, ata MEP a dal back duro bisando cu e.o. van Putten no tin weso di lomba.  Mi a goza e reaccion di MPA, kendenan ta mustra cu van Putten tin weso di lomba y pa colmo ta docter di lomba tambe!

•  

• Despues di Renato, awor ta Willem ta na turno pa haye inunda cu misilnan di MEP, principalmente di Ministro di Transporte.

•  

• By the way, boso ta kere e storia pakico e cifranan di Turismo di ATA ta atraza?  Boso ta kere e asunto di A.O. ey?   Ta hacimi corda e mesun storia di virus cu a come surplus di un Gobierno, den siglo pasa na Aruba.

•  

• Awor, ki excusa lo bin cune pa bisa cu e cifranan di Aeropuerto tambe ta atraza?  Pa esaki sigur por bin cu uno cu no tin di haber cu demasiado A.O. di personal.  Kizas Aeropuerto por bin cu e excusa, cu e trahadornan no por a drenta nan Parkinglot Automatico debi na un glitch di computer.

•  

• Papiando di demasiado A.O., keto bay e situacion ta perempempem na Prison di KIA.  Usando un triki bieu di Ambtenaarnan, nan ta “meld ziek” riba Diabierna pa asina nan no por core warda ni Diasabra ni Diadomingo.  Pa colmo, Departamento di BGD no tin Docter den weekend.

•  

• Pero ora cu Dialuna yega, esnan cu a meld ziek e ora si nan tur ta bay back pa trabao.  Sinembargo e daño a worde cometi caba.

•  

• Boso ta corda tempo cu bo ta bay school, y si acaso bo keda un dia sin presenta... cu bo tin di regresa cu un carta di docter of di mayor?  Que hubo nan cuminza haci algo asina pa Prison di KIA?  Si e trahador bin back cu un carta di docter, e ora e lo haya su dianan paga.  Sino, e pago di Diasabra y Diadomingo lo worde desconta.  Asina kizas por soluciona e situacion di demasiado A.O.

•  

• Algo pret ta cu ora e trahadornan a bay na Centro di Husticia pa reuni cu Ministro, esaki tabata un no-show.  Nan a kere cu ta cu A.O. el a bay, pero despues a haya sa cu e fecha di reunion a worde cambia pa Februari.

•  

• Shonnan, papia uno y papia dos.  Pero e imagen cu por a mira na Aruba, di e cifranan di Urna Electoral na September 2004, ta mucho mihor cu e televidentenan di Curaçao a mira.  Esnan di Curaçao, casi bo no por lesa e cifranan mes riba e spreadsheet di Excel cu nan a usa.

•  

• By the way, boso a mira e cobertura di TV Curasoleño?  Ta parce cu ey nan tin mas talento y fantasia ora di traha propaganda, of mi ta fout?

•  

• Nan por wel di tin fantasia... pero tog mi tin di aplaudi e promocion nobo di Lotto pa nan catochi di “Zodiac”.  Bo sa cu ya caba tin hopi hende anciosamente wardando pa e benta di e loteria nobo aki cuminza?  Hasta mi casa kende no ta cumpra catochi, a bisa cu awor si el a haya gana di cumpra Zodiac.

•  

• Un desaprobacion total pa e persona cu a crea un mensahe falso, y menciona nomber di muhernan inocente di Aruba como hendenan cu tin malesa di AIDS.  Lo mas tristo ta e hendenan cu a sigui “forward” e e-mailnan aki, pa asina sigui plama noticia incorecto como tambe falso.

•  

• Shonnan, cu asina hopi awacero e dianan aki, mihor cuminza prepara pa e demas lunanan cu ta sigui.  Si acaso bo ta planeando un fiesta grandi pa tuma lugar aki poco tempo, bon idea ta pa bo escoge un lugar cu tin un dak grandi riba dje!

•  

• Increible!  Mi curpa a haya dolor Diasabra pasa, ora cu mi a tribi di pasa cu mi auto riba e caminda door di Rooi Frances.  E por haya e titulo di e caretera di mas malo cu Aruba a yega di conoce.  Mi ta kere cu pa proximo lunanan, mi lo no tribi di pasa eybanda mas!

•  

• Diadomingo anochi, pa Dialuna mainta tabata hopi frieu mes na Aruba.  E aire pafor tabata asina frieu, cu bo por a hasta drumi sin airco!  Bon idea pa spaar placa e dianan aki.

•  

• By the way, mi no tabata sa cu CarlMichael tabata un cantante!  El a sa di pone nos tur cuminza balia bay goal den Aruba Entertainment Center.  Lo dushi ta, cu e lugar no tabatin nada di lodo pa stroba e fiesta y celebracion!

•  

• Mi ta kere cu e “guera” entre MEP y oposicion ta casi igual, pues “fifty-fifty”.  Awor ata Otmar ta bisa cu Ady di MEP a desvia di su idealnan di proteha e clase trahador, pues envez di proteha e empleadonan di Aruba Grand... nan a prefera di proteha e compania.

•  

• Mañan  e representante di e cervez Heineken lo menciona dos nomber di esnan cu a bira ganador. Ta asina e ganador di e carchinan lo bay Puerto Rico na unda The Rolling Stone lo duna un concerto riba 11 di februari. Tanto e viahe y hotel  Heineken lo cubri.  Ami y mi casa ta loco pa gana!

•  

• Porfin Arendsstraat lo worde cera pa construccion di e caretera ta bay tuma lugar.  Pecador no ta sufri pa largo sa worde bisa.

•  

•  Un tempo bo tabata por a scucha sangura pasa Zuuuuuuummmmmm banda bo. Pero e tipo di sanguranan cu ta circula no ta produci sonido nan a para bira politiconan nan ta djis "Hit and Run".

•  

Romeo, Voz di Tribon.