Lucha di ambtenaarnan ta worde usa door di Gobierno

 GOBIERNO TA DESHACI DI PRUEBA KICO A HACI CU PLACA!

 *Confirmacion con Nilo tabata hinca cifranan den otro

*Ministerio Publico ta bay actua contra Gobierno Oduber?

 ORANJESTAD(AAN)—Ministerio Publico ta lanta para y exigi pa ningun pista cu por conduci na mas escandalo manera caso laboratorio, manipulacion cu cifranan di pueblo, abuso di placa pa famia y amigo, worde destrui? Informacionnan clave di DIARIO ta indica cu Gobierno no kier pa e lucha di ambtenaarnan caba, pasobra asina bista di pueblo ta keda dirigi riba e accionnan.

Mientras esey ta socede, Gobierno cu a kere cu den otro situacion e lo por a destrui pruebanan di loke el a haci cu placa di pueblo mientras Ministerio Publico tabata persigui caso Fondo pe, ta den un ansia pa deshaci di pruebanan pa loke el a haci cu placa di pueblo.

Pasonan mester worde tuma pa reorganiza Centrale Accountantsdienst y Algemene Rekenkamer, cu no a vigila kico ta pasa cu placa di pueblo manera mester tabata, durante Gobierno Oduber!  Segun informantenan si trata cifranan manera mester ta, loke Algemene Rekenkamer kier evita, Laboratorio ta djis parti di un desaster total! 

No tin nada cu ta scapa DIARIO. Asina awor ta bin afo pakico denuncia a worde entrega na autoridad contra e forma cu e tabata manipula cu cifranan. E hefe di momento no a haya loke e tabata kier y pesey a entrega un denuncia contra Nilo pa e forma cu e ta atende cu cifranan di Aruba, cu ta un wega y un bofon di entre otro Ley di Contabilidad.

Segun e procedura pa yega na cifranan real pa presupuesto, Directie Financien mester ricibi e “wenselijkheidsbegroting” di Gobierno. E documento aki ta worde discuti cu e servicionan en cuestion y e ora ta yega na e begroting final.

Manera DIARIO por a comprende, Nilo tabata percura pa e schedule cay den otro. Door cu no tabata tin tempo pa sigui e procedura cu Ley ta exigi, e tabata deshaci di participacion directo di e departamentonan di Gobierno, cu por a bisa si e cifranan ta cuadra cu loke e departamentonan mester.

Ya cu no tabata tin tempo pa e procedura normal, e mes tabata pone cifra y pesey e persona cu tabata na cabez e tempo di Directie Financien, cu pa colmo tabata rabia tambe pasobra a pesar di e hecho cu e ta MEP (aparentemente di Nel) y no a haya loke el a pidi, a dicidi di entrega un keho contra Nilo Swaen, cu a worde acusa di ta presenta cifranan cu ta basa riba realidad den presupuesto. E denuncia aki tambe a bay cu spiritonan di Ministerio Publico!

Informantenan a bisa DIARIO cu presupuesto di 2009, cu mester ta bon di acuerdo cu compromiso cu Aruba tin cu Hulanda, a worde cera door di un Hulandes. Promer cu e presupuesto aki, ningun a worde entrega na tempo pa por a sigui e procedura normal y ta ora e fecha cu e cifranan mester worde presenta na Parlamento yega, Nilo tabata dicidi con presupuesto lo ta.

“Laboratorio por ta cuminzamento di un desaster total,” informantenan a bisa DIARIO. E culpa no ta di Gobierno so pero tambe di Algemene Rekenkamer Aruba y Centrale Accountantsdienst, cu mescos cu Financien no a controla Gobierno Oduber manera mester tabata.

“Si nan revisa e cifranan bon tin mas caso ta bin,” informacionnan ta bisa di fuentenan cu ta contento cu den e caso Laboratorio, Banco Central ta exigi investigacion.

Ta worde papia di cifranan scondi cu mester a bay pa “family and friends” y segun ta worde bisa na DIARIO mester investiga Departamento di Finanza mes mescos cu e loke Algemene Rekenkamer y Centrale Accountantsdienst a haci.

Pesey awor nan ta coopera cu Gobierno pa no trata cifranan anual manera mester ta, loke ta stroba pueblo haya un bista cla riba loke Gobierno a haci cu su placa.

Mientrastanto manera DIARIO a bisa, mudanza di Financien no ta trece cune cu ta bay warda documentonan importante den un lugar sigur, pero cu ta hiba nan Nationaal Archief, loke ta algo increibel.

Na Hulanda nan ta hunga cu e computer cu a crash den man di Financien y ta aci cu tur corespondencia, consehonan, relatonan, decisionnan ta bay perdi mas ainda si documentonan tambe bay “crash” den mudanza, cu manera e caso Rijbewijs a mustra ta sumamente peligroso pa loke ta trata documento.

DIARIO ta sigui tur desaroyo di acerca y ta spera cu autoridad penal demostra cu e ta imparcial y si e por papia papiamento of no, evita pa prueba di loke por bira caso den nan man, bay perdi.

 Back