Ken di cu no tin
placa?
UN CONTRACTO
DI 100 MIL FLORIN PA UN STACION DI RADIO
Friends & Family ta keda goza
y pueblo tin cu keda roga y roga
ORANJESTAD (AAN): E ultimo
simanan Aruba tabata den un incertidumbre grandi. Empleadonan publico y
di fundacionan ta pidiendo pa indexering, pero for di parti di nan
dunador di trabao, esta gobierno, no tin ningun comprension pa e
situacion.
For di aņa
2002 e trahadornan aki a worde pidi pa warda pasobra situacion ta
fastioso. Awe, 7 aņa despues, ainda gobierno di MEP no kier tende di
indexering pa e empleadonan. Pa kico? Atrobe e contesta di gobierno di
MEP ta cu no tin placa y cu situacion ta malo.
Pero e
situacion no por ta dje malo ey! Pasobra ta mas cu evidente cu placa pa
"Friends & Family" si tin. Y aki no ta tira na laira y spera pa "raka".
Pruebanan tin na granel. Un ehempel barbaro ta e beneficionan cu rumanan
di Nel Oduber a y ta hayando for di "caha publico". "Abogadonan"
ruman di minister ta worde paga miyones y PER DIRECT! Nan si no tin di
warda 7 aņa largo! Ruman di Minister Presidente ta fungi como "liason"
entre China y Aruba. Pa nan si tin placa.
For di fuentenan fidedigno, a
bin na cla cu tin un stacion di radio cu a haya un contract for di
Minister Marisol Lopez-Tromp, cu tin tur ingrediente pa por worde
cataloga pa corupccion serio. E doņo di e stacion di radio aki ta haya
100,000.00 Florin pa por formula y crea propagandanan pa Minister di
Marisol Lopez-Tromp su ministerionan. Esaki ariba su mes ta motibo caba
pa e worde cataloga pa corupccion pa motibo cu no tabata tin ningun
destaho publico. Loke ta haci e asunto hopi mas serio ta cu e doņo di e
stacion di radio no ta ni haci e trabao cu e ta worde paga pe. Y
gobierno di MEP no ta faya ningun dia di pago pa e doņo di e stacion di
radio aki. Tur su pagonan ta bay sin tardanza of PER DIRECT!
Ora cu DIARIO a kere cu e
asunto no por bira mas bergonsoso, ta bin sali na cla cu ta un trahador
den un ministerio di Marisol Lopez-Tromp mes ta formula y crea e
propagandanan. Esey kiermen cu, pa trabao cu un trahador den gobierno
mes ta haci, Minister Marisol Lopez-Tromp ta paga un comerciante, doņo
di un stacion di radio, 100,000.00 Florin.
Ta tristo pa mira con
empleadonan publico y di fundacionan tin cu manifesta dia aden y dia afo
pa nan derecho y gobierno di MEP ta keda sordo pa e empleadonan aki. Nan
tin di keda den e solo cayente dia aden dia afo pa por haya atencion di
gobierno di MEP. Mayoria di nan ta bay manifesta, sabiendo cu nan lo
perde parti di nan salario! Y kico Minister di Educasion ta haci ? Paga
un comerciante 100,000.00 Florin pa un trabao cu un trahador di gobierno
mes ta haci!
Ta ken a bisa cu no tin placa?
Placa tin, pero ta depende pa ken y pa kico! Placa tin pa "Friends &
Family" y e utlimo aki ta haci e mandatarionan di MEP hopi dolor. Cada
biaha cu nan haci nan contra-atakenan, por tende nan lamenta di "Friends
& Family". Pero e dolor di e pueblo, pa via di BBO, no ta comprendibel
pa partido MEP. Nan a perde tur sorto di gevoel. Awor aki cu nan tin 7
aņa den gobierno, ainda nan no por a resolve e problemanan di AZV. Maske
cu nan a priminti di lo a baha e prima di AZV, for di aņa 2001, ainda e
gobierno aki tin di baha algo ainda pa e pueblo. E unico cos cu nan a
haci for di aņa 2001, ta subi y subi prijs di tur cos aki na Aruba.
Poder di "Friends & Family" ta
uno incomprendibel pa pueblo, pero pa MEP e ta parce algo masha natural.
Back
