Entrante 3 di Juli nan lo cuminza cu tres vuelo diario…

TIARA AIR TA HAYA PERMISO BEK PA BULA PA PUNTO FIJO

ORANJESTAD (AAN):  Ayeratardi, DIARIO a haya e noticia tremendo cu Tiara Air ta re-inicia entrante 3 di Juli su vuelonan directo pa Las Piedras, Punto Fijo.

  Por corda cu algun luna pasa,  pa motibonan fuera di nan control,  Tiara Air mester a stop di bula e ruta aki lagando un clientela hopi grandi sin por a haci uso mas di nan tremendo servicio.

  Awor,  Diabierna pasa, Gerencia y personal di Tiara Air a ricibi e grato noticia cu nan a bolbe haya ok pa sigui opera riba e ruta aki cu ta hopi gusta pa e arubianonan pero tambe pa e venezolanonan, cu ta un mercado excelente pa nos isla.

  Tiara Air lo bula 3 biaha pa dia cuminzando Diabierna awor 3 di Juli. DIARIO a wordo informa cu tanto gerencia como staff di Tiara Air ta hopi contento cu e logro aki cu sigur ta un otro stap mas den loke ta e ampliacion di nan servicio.

  Mas den siman, DIARIO lo trece dilanti mas informacion relaciona cu e itinerarionan di Tiara Air relaciona cu e vuelo aki pa Las Piedras, Punto Fijo. Keda pendiente. 

Back