E sentencia tabata peor pa ATIA, AHATA y AAA….

HUEZ A PERMITI MARCHA DI PROTESTA SIGUI Y NAN A PASA DILANTI DI AEROPUERTO

ORANJESTAD (AAN): Diasabra mainta atrobe e sindicatonan den accion mester a bay corte pa motibo cu gremionan commercial e biaha aki a manda nan corte.

  Den e caso aki AHATA, ATIA y AAA a hiba e sindicatonan pa purba kibra e presion di e lucha di e empleadonan publico y pensionadonan.

  Pero despues cu Huez a scucha version di e sindicatonan el a bisa cu e marcha ta hustifica, y cu solamente nan no mag di blokea e cruzadanan. Akinan atrobe ta na unda e sindicatonan a sali satisfecho for di corte caminda nan a bay caminda pa SIMAR na unda nan tabata tin un reunion cu tur nan miembronan pa papia di e proximo accionnan.

  Di parti Sr. Yrausquin di ATIA el a bisa cu nan no ta contra e lucha, pero cu e no mester bay a costo di comercio y ta esey nan ta preocupa pe.

   Pero e trahadornan den accion cu a bay bisti cu nan t-shirt “Indexering awe” a keda para ariba cu nan ta buscando nan derecho y cu tambe nan ta busca atencion di gobierno pa duna nan nan indexering. Y cu nan lo keda lucha te na unda cu nan por pa logra esey.

  E sentencia a haci e situacion mas peor pa AAA, AHATA y ATIA mirando cu durante e prome accion e sindicato den accion cu nan miembronan a yega te na e cruzada di aeropuerto y despues bay links net prome cu e entrada di tereno di aeropuerto direccion.