|
|
|
|||||||||||
|
 |
Yiu homber a yega diasabra for di Hulanda: CASO DRAMATICO A SHOCK HENTER ARUBA ORANJESTAD (AAN): E caso lamentable cu a tuma lugar Diabierna anochi na Macuarima a shock henter e pueblo di Aruba ya cu e tabata un caso sumamente tristo caminda un yiu ta mata su mayornan y su ruman homber. Unda cu bo bay bo por scucha di e caso lamentable aki, caminda ningun hende por compronde kico por a pasa den e mucha homber aki su cabez pa yega na tal extremo. Esaki ta un hoben cu su mente a bay hopi leu caba den adiccion y kizas cuanto mayor mas no ta pasando den problema cu nan yiu, pero pa miedo y cu no sa unda pa cana ta keda den silencio y bibando cu miedo dia y anochi. E famia cu a fayece ta un famia bon conoci den e bario di Sta. Cruz y pa e pueblo di Aruba en general ya cu Sr. Lampe ta un conocido bendedor di barbeque caminda casi tur Diadomingo y dianan di fiesta ta bende su dushi barbeque cu e pueblo. E yiu homber Edvard ta conocido locutor na radio y tambe ta un fiel participante na festivalnan cu tin. Un pregunta cu tur hende ta haci ta cu nan no por compronde kico a pasa. Ta con e hoben aki a haci pa mata tur tres persona y pa despues kier of a cende nan na candela. Kico por a pasa den su cabez, of kico ta pasando cune? Esaki ta cosnan cu mester bay worde investiga y pa saca afor kico berdaderamente a sosode cu a shock henter e comunidad cu a keda den un tristeza inmenso cu casonan asina ta sosode aki na Aruba. Mientrastanto ya caba un yiu homber cu tabata bibando na Hulanda a yega Aruba diasabra unda el a ser ricibi tambe pa miembronan di recherché cu ta investigando e caso. Na momento cu e caso a sosode mesora nan a yame notifike y el a logra yega Aruba mesora tambe algun ora despues. Ta momentonan dificil pe sigur cu ta bin haya tres familiar mata cruelmente pa su mesun ruman homber. E sospechoso den e caso aki ta Eugene Giancarlo Lampe naci na Aruba 05-02-1979. Despues di su detencion el a ser hiba hospital caminda cu a saca sanger pa testnan na laboratorium y sera e caso den su totalidad prome cu e ser presenta dilanti di huez. |
||||||||||
|
|
||||||||||||
|
||||||||||||
