UN GOBIERNO FATALMENTE REPRESIVO!

       Reconstruyendo loke mi a yega di bisa na 2004, e momento ta propicio pa ripiti cu: ningun hende na mundo por mira futuro den un bola di cristal. Tur loke por haci ta tuma e sucesonan di pasado y riba nan construi loke por spera di porvenir. E no ta e extraccion di algun ley cientifico, o di un formula matematico, e ta simplemente e combinacion di experiencia y analisisnan concreto. Y asina mes...pronostica cu acierto absoluto loke ta spera nos den futuro ta keda dificil.

       Por ehemplo, ta con mi por a adivina na 2004 cu un cadena di escandalonan feroz tabata bay rebenta den seno di Gobierno pa mancha nos historia reciente cu tanto sushedad? E dictadura di MEP no ta un fenomeno aisla o desconoci na Aruba, sino mas bien e forma constante y normal cu e partido ey a bin ta goberna cada biaha cu e drenta gobierno. Cu MEP, e leynan constitutivo vigente ta consagra e mentira di libertadnan y podernan ilusorio riba nos isla, exponi cu doloroso claridad den diferente caso reciente, entre nan esun di Hendrik. No a preocupa Nel y Rudy en lo absoluto cu un oficial di polis a ser gedal cu auto, of cu un chofer a nenga alevosamente di obedece un agente di orden publico, pasobra na lugar di asegura poblacion cu ley ta aplicable por igual na tur habitante di nos isla, ata nan a bay menaza poblacion cu si no laga e agresor bay, cosnan grandi ta bay pasa na Aruba! Un actitud increiblemente arogante y reprochable, pero facilmente comprendible den e dictadorcitonan di MEP.

       Pa sigui clarifica, mi a yega di bisa tambe den pasado cu e postura mas facil cu mi por tuma  ta esun di retira y laga e politiconan haci y deshaci na nan antoho, pero esey ta involucra un tipo di cobardia cu no ta pas cu mi caracter. Si mi mester haya critica, funda o infunda, si ken cu ta bira personal o sushi den su inventonan, nan mester compronde bon cla cu nada di esey ta afectami o ta bay causa un virahe den mi actitud o mi pensamentonan.  Ta asina mi ta y asina mi ta keda!

       Awe nos ta enfrentando un Gobierno fatalmente represivo, pero lomba contra muraya pa motibo di e hechonan cu e mes a crea y no por controla. Tur hende a avise contra e introduccion di B.B.O., pero capricho a tuma prioridad riba sentido comun, y ata
prijsnan a yega halturanan desconoci riba nos isla. El a priminti indexering y awor ta nenga di cumpli cune, parcialmente pa falta di placa, y parcialmente pa demostra den practica nan lema ¨ta nos ta manda! Ignorando absolutamente cu e berdadero poder ta den man di esnan cu ta oponiendo e, Gobierno ta coriendo alocadamente den direccon di su propio destruccion.

       Si tabata reina caba un intrankilidad bisto den e sindicatonan pa motibo di e aumento barbaro den e costo di bida, impulsa pa un B.B.O. inoportuno y imprudente, awor cu nan a compronde ta cu ki clase di mentalidad nan ta tratando, cosnan a bruha por completo. Di un banda, un Gobierno dictatorial y caprichoso, y di otro banda, hendenan cu ta reclamando e derecho di indexering pa por nivela maske ta den algun grado, nan salarionan versus e costonan constantemente den ascenso.

       Tur esnan cu no tin bril di palo bisti a mira cu preocupacion e efectonan negativo cu tur e medidanan lo causa. Turbulencia den mundo sindical y obrero, y un freno pa inversionnan di exterior tabata consecuencianan previsible. E pensamento economico o financiero tras di e medidanan no ta cana paralelo cu e situacion economico y financiero real, nan ta un extracto defectuoso di dje, no su refleho. Subi e entradanan di Gobierno sin baha su gastonan, por ehemplo, ta igual na tira un shovel di santo den laman pretendiendo di dempel e completamente. Y e bahamento di gastonan no tin pakico sosode riba e custiya di e trahadornan! Tin hopi huur, por ehemplo, cu por ser evita mandando e Ministronan back pa Bestuurskantoor, y tur e casonan legal cu e departamento encarga cu asuntonan legal di Gobierno por maneha sin costa nada, na lugar di prop tanto miyon den e saconan di abogadonan sinberguenza.

     Pa conclui, semper mi a para na banda di Aruba y di su Pueblo sin ningun reserva, y nada na mundo ta bay hacimi cambia e postura personal ey. Mi a lucha banda di Betico pa Pueblo logra e Status Aparte cu e tin awor. Mi ganashi personal pa mi esfuerzonan? Un serie di enemigo riba e nivelnan mas halto na Hulanda, Antillas y Aruba. Pero, mi tabata tin un lider den
kende mi tabata confia, y un bandera pa lucha pe: e bienestar di Aruba y di su Pueblo. Tempo a duna nos razon! E lucha tabata necesario pa habri e caminda, pa entre otro, un nacionalismo berdadero.

       Pero awe, di e status cu nos a logra, no a keda cos di gaba. Departamentonan di Gobierno ta pesta di elementonan stranhero, cuerpo policial tin un Comisario Europeo politicamente condescendiente, y Ministerio Publico a para caba den un showcase di teoria y parcialidad.

       Personalmente mi ta a ora e presencia di un Florencio Wernet, P.G., y en especial di un Olindo Koolman, Gobernador, kendenan ta resumi den nan espiritunan, nan caracternan y actuacionnan, e berdadero esencia di un Arubiano: fiel na su principionan, creyente leal den paz y progreso, y firme den e aceptacion y aplicacion imparcial di Husticia!