LIDERNAN OLIMPICO TA REUNI NA BEIJING

ORANJESTAD (AAN) ---Centenares di líder Olimpico nacional di tur parti di mundo ta yegando Beijing pa e Asamblea General di ACON, e Asociacion di Comitenan Olimpico Nacional, programa pa tuma lugar e siman aki. 

“Ta un tradición pa nos reuni den e ciudad cu ta organisa e Weganan Olimpico durante e aña di e Weganan”, Mario Vazquez Raña, Presidente di ACON a splica. 

E Asamblea di e aña aki por bira esun di mas grandi den historia, atrayendo mas cu 400 delegado di e 205 Comite Olimpico Nacional. Un otro 300 persona ta atende e reunionnan di parti di Comite Olimpico Internacional, Federacionnan deportivo, prensa, ciudadnan candidato pa proximo weganan, personal di e Comite Organizador di Beijing (BOCOG) y otro personanan cu tin di haber cu deporte Olimpico. En total mas cu 800 persona ta atendiendo e reunionnan na Beijing.

E Asamblea ta wordo considera critico pa e Comiténan Olimpico Nacional, nan ultimo oportunidad pa regla nan asuntonan di logística y otro necesidadnan durante e Weganan cu e organizadornan na Beijing. E relato cu BOCOG lo presenta durante e Asamblea, cu lo dura probablemente algún ora, lo ta un di e puntonan mas resaltante di e siman.

Algun Comité Olimpico grandi, manera USA, Spaña y Australia, ta conta cu un staff cu ya caba a hasi varios bishita pa prepara pa e Weganan Olimpico di Beijing, pero Comitenan chikito ta depende di e biahe aki pa sera conoci cu e ciudad sede y pa bishita e stadionnan y e Villa Olimpico.

"Mi ta kere cu loke nos lo scucha ta un refleccion di realidad," Vazquez Raña a bisa tocante e preocupación di e Comitenan Olimpico pa Beijing.  "Poco poco, mi ta kere cu lo tin cada biaha menos problema, na momento cu e Weganan ta yegando cada biaha mas cerca. Mi ta hopi satisfecho cu loke a wordo hasi te cu awor. Nos tin confianza cu esakinan lo ta Weganan Olimpico maraviyoso,” e líder di ACON ta expresa.

E palabra boycott “a disparse for di nos diccionario”
E palabra boycott a aparece den mayoria di e preguntanan cu a wordo hasi na Vazquez Raña durante un conferencia di prensa na Beijing. Mescos cu otro lidernan den IOC, Vazquez Raña a bisa cu pa protestanan político asina no tin lugar den e Weganan awendia. “Mi tin confianza cu den nos Weganan lo no tin boycott mas, nunca mas,” ela enfatiza.

Riba preguntanan si IOC lo mester ta envolví den e controversia cu China ta enfrenta na Tibet, Vazquez Raña ta bisa cu e tin duele tocante e violencia cu a tuma lugar. Pero e ta bisa cu “esaki ta un asunto cu e Weganan Olimpico lo no resolve. E no ta competencia di e Movimento Olimpico pa resolve.”

Y e ta duna e lidernan político cu según e tin nan propio agenda hasiendo un yamada pa boicotea e Weganan un comentario critico. “Mi ta spera di berdad cu nos compañeronan político, mi kier men e gobiernonan, lo no usa e Weganan Olimpico como un pretexto pa lanza boycott pa saca algún beneficio individual for di esaki,” ela adverti. Según Presidente di ACNO, Mario Vazquez Raña, e único victimanan di un boycott ta e atletanan.