ABBA tA recorda Nigel Zara

ORANJESTAD(AAN)---Ta dificil pa compronde cu Nigel a bay laga nos. Di mucha masha chikito nos a waak'e desaroya bira un streya di baseball Arubano.

Bo ta observa durante wega e intensidad y amor cu Nigel ta hunga baseball. Nos a disfruta di su momentonan di alegria y console ora e tabata den tristesa. Ora nos waak'e yora riba tereno bo ta ripara e gran personahe di baseball cu Nigel tabata.

Den weganan Nigel ta duna tur cos pa yuda su ekipo gana. E ta haci uso maximo di su talentonan como short stop, pitcher of otro posicion y tambe na bate. Nigel semper tabata un bateador temibel pa hopi pitcher.

Cu su edad di 13 aña ya Nigel tabatin un historia largo den baseball. Nigel a cuminsa den categoria Rookies A (5 y 6 aña) na 2000 cu e ekipo di Bright Bakery. Na 2002 Nigel a subi pa Rookies AA (7 y 8 aña). Tambe cu e ekipo di Bright Bakery y nan a bira sub-campeon di Aruba. E siguiente aña Nigel a yuda su ekipo bira campeon Rookies AA 2003.

Despues di a hunga 4 aña T-ball, Nigel a subi na 2004 pa e categoria Pre-Infantil (awendia e yama Infantil A) cu e ekipo Toro Safety Matches, hungando un baseball completo cu picheo. Su ekipo a logra termina na di 4to lugar di e campeonato. Nigel tabata hopi talentoso y a forma parti di e seleccion nacional Pre-Infantil 2004 cu a participa na e Panamericano di COPABE na Guatemala.

Nigel hunto cu Chadwick Tromp tabata e peloteronan mas hoben di e seleccion cu 9 aña. Na 2005 Nigel tabatin un tremendo aña den categoria Pre-Infantil. Como pitcher Nigel a gana 6 wega y perde 2. Como bateador Nigel tabatin un averahe di 340.

Nigel tabatin 18 hit, di cual 5 doblete y 2 triple. Tambe Nigel a empuha 11 careda. Naturalmente Nigel un biaha mas tabata den e seleccion nacional cu a participa na e Panamericano na Cuba. Nigel a hunga cu Cardinals den categoria Infantil AA (11 y 12 aña) na e campeonato 2006-2007 di ABBA/LOTTO LEAGUE.

Nigel un biaha mas tabatin un bon aña y a forma parti di e seleccion nacional Infantil AA, pero cu lamentablemente no a participa na e Panamericano.

Nigel a participa recientemente na e campeonato 2007-2008 di ABBA/LOTTO LEAGUE cu Cardinals den categoria Hubenil A (13 y 14 aña). Nos a conoce Nigel como un atleta masha keto, disciplina y cu respet pa tur hende. Nigel a hunga baseball cu hopi devocion y a yuda Aruba competi fuertemente na e Panamericanonan. Nos ta orguyoso di Nigel.

Baseball Arubano lo haya falta di Nigel, pero nos ta convenci cu e lo sigui hunga baseball den Reino di Señor.