|
|
|
|||||||||||
|
 |
ENFOQUE SOCIAL DOMINEE HESSEN AWE TIN 50 AÑA COMO DOMINEE ORANJESTAD (AAN): Awe, 17 di augustus 2006, dominee Hessen ta recorda cu e ta sirbiendo Dios pa 50 aña. Na augustus 1956 el a regresa Suriname, despues cu el a finalisa su estudio di Theologie na Hulanda. Te cu aña 1965 el a traha como domi di Evangelische Broedergemeente (Hernnhutters) na Suriname. Despues domi a keda te cu 1971 na Curaçao. Di 1971 pa 1992 el a traha na Aruba sirbiendo Dios. Como domi el a traha na Kerki Portestant na Piedra Plat y San Nicolaas mas tanto. Na aña 1992 domi y su senora a bay biba na Hulanda despues cu domi a baha cu pensioen unda dominee Hessen tabata studentenmentor di Den Haag pa algun aña y tabata yuda na Arubahuis cu trabao di traduci. Tambe nos domi tabata den redaccion di Noticiero Aruba y a duna les di Aleman. Durante tur e añanan na Aruba, dominee Hessen tabata activo tambe ariba diferente tereno. el a duna Godsdienst y Aleman na Colegio Arubano y tabata entre otro voorzitter den Bestuur di Avondonderwijs pa Havo. Tambe el a duna les di Aleman na Enseñanza pa Empleo, e tabata entre otro onder-voorzitter den Bestuur di ATHA di Aruba y den Padvinderij como voorzitter di groepscommissie di Santanerogroep. Tambe e tabata den Oudercommissie di Mon Plaisir Kleuterschool. Na april 1991 dominee Hessen a worde condecora como Ridder in de Orde van Oranje Nassau. Awor aki dominee Hessen ta e representante official pa ATHA di Aruba na Hulanda cu ta mantene contacto cu instancianan. Tambe e ta secretario den un Huurdersvereniging y e ta predica den sirbishinan unda cu nan ta puntr’e, pero regularmente den sirbishinan na Amsterdam, unda e ta yuda e domi di Evangelische Broedergemeente. JOYCE HERRY A ENTREGA BUKI NA HULANDA ORANJESTAD (AAN): Informacion di Hulanda ta indica cu e autor Arubano Joyce Herry a haci entrega di su buki “Ollie, Assie y Pelie – un storia moderno tocante amistad” na Minister Plenipotenciario sr. Frido Croes. E buki aki ta un traduccion na Papiamento di e buki cu Joyce Herry a publica na October aña pasa. E buki ta skirbi pa mucha y a keda ilustra cu pinturanan di Yvonne Duncan.
Sr. Croes a felicita Joyce Herry cu e bunita buki aki y a bisa di ta contento pa mira cu nos autornan Arubano ta enriquese nos literatura hubenil cu bukinan den nos idioma Papiamento. Joyce Herry a nace na Aruba y a biba mas cu binti aña na su isla natal. Na 1966 el a bin Hulanda pa sigui un estudio pa secretaria professional na e Intituto Schroevers. Como mucha caba Joyce tabata tin e ambicion pa bira escritora y awor a tuma e curashi pa realisa su soño. Joyce Herry ta un di e autornan cu lo participa na e Siman di Buki na Aruba proximamente. Kinikini ambulance den coperacion cu Valero ta haci bunita donacion na school basico washinton AWOR TUR MAESTRANAN DI E SCHOOL TA CERTIFICA. ORANJESTAD (AAN): Pa basta luna caba kinikini ambulance den bon coperacion cu Valero a ofrece school basico washinton e oportunidad pa tuma e curso first aid – cpr y AED.
Cabesante di e school mesora a tuma e gesto aki man habri y tur e maestronan a hayanan ta bin school back durante nan vacacion pa tuma e curso aki. E curso tabata completamente gratis y cada maestro mester a paga 10 Florin pa e certificado.
Pa sorpresa di e maestranan y e cabesante na final di e curso e dos companianan aki a entrega e school un first aid box grandi na balor di e suma cu nan a ricibi.
Di e forma aki e dos entidadnan kier duna algo back na comunidad.
Awor e maestranan di e school aki sa kico pa haci ora un emergencia presenta na school y na nan cas, segur awor cu nan conesemento y un bon first aid box.
Kinikini ambulance a compromete su mes pa rifil e first aid box aki ora ta necesario y of ora productonan caduca.
Manera tur hende sa school basico washinton ta e school basico mas grande di Aruba,pero tambe cu e school ta consisti di solamente maestra. Directora di Kinikini ambulance, Ilsa Lacle no por tabata presente y la ser representa pa Charmaine Pietersz. Tur persona of grupo cu ta interesa den les di First Aid, CPR Y AED por yama libremente na nos number di emergencia 739-9911. Banco un biaha mas cu oferta special! CMCC TA FREEZE BO PAGO MENSUAL ORANJESTAD (AAN): Durante un anochi masha ameno, Sr. Javier Wolter, Gerente di CMB, a yama bon bini na tur agencia di auto y bromer, miembronan di prensa y demas invitadonan, pa sera conoci cu Caribbean Mercantile Credit Company N.V. su facilidadnan nobo, mas espacioso y confortabel pa e clientenan. Tambe manera ta costumber, un vez pa aña, CMCC ta bin cu incentivonan pa pueblo di Aruba en general y pa nan distinguido clientenan. Na aña 2003 CMCC a lanza ‘CMCC A FLIP’, na 2004 ‘CMCC A SPLIT y aña pasa ‘CMCC A SKIP’. E aña aki, Sr. Elvin Geerman, Gerente di Caribbean Mercantile Credit Company N.V. tabata tin e honor di anuncia e promocion di e aña aki, esta CMCC TA FREEZE. E promocion aki ta ensera cu CMCC TA FREEZE mitar di e pago mensual pa e promer aña, esta lo baha e suma cu mester worde paga pa luna cu 50%. Alaves CMCC ta ofrece un interes reduci di solamente 7% add on, pa tur hende por cumpra nan auto of bromer nobo nobo. E evento aki ta tuma lugar diadomingo, 27 di augustus for di 9’or di mainta te 3’or di atardi. E aña aki pa motibo di construccion di e caretera na L.G. Smith Boulevard, CMCC lo muda su Car Show grandi aki pa CMB Noord Branch. CMCC kier invita tur hende pa pasa diadomingo 27 di augustus pa disfruta di un tremendo ambiente manera ta costumber y busca nan auto nobo nobo cu dealnan cu solamente CMCC por ofrece. PREPARABO …BALASHI TA BAY GARABO ORANJESTAD (AAN): Siman pasa e team di Balashi a bay di paranda atrobe. E team a pasa diferente bar/ restuarant pa gara amantenan di Balashi pa saca nan potret y regala nan un pakete di Balashi.
E lugarnan cu e team a pasa ta na Pre-Stage y na Peking restaurant. Manera ta conosi pronto Balashi lo saca e gran ganador/a di e campania di Preparabo... Balashi ta bay garabo.
Asina ta tur e Balashi loversnan bebe bo Balashi bon frieu y gana cu Balashi. Riba e potretnan por mira con contento e ganadornan ta bira ora e team di Balashi ta gara nan. E final ganador ta gana un Weekend-Stay na Rennaisance, mas 500,00 Florin cash. Balashi di nos e ta! TAYERNAN BAO DIRECCION DI JAN FORMANNOY A CUMINZA ORANJESTAD (AAN): Manera publico en general sa cu actualmente Fundacion Muchila Creativo en cooperacion cu UNOCA ta ofrece diferente tayer di muscia bao direccion di e conocido guitarista Jan Formannoy cu ta docente di guitara, musica di jazz y musica popular. Diasabra ultimo a cuminsa e tayer unda e participantenan a participa activamente na e tayer di Jazz. Jan ta docente di guitara y hefe di e departamento di Jazz y musica popular na e Conservatorio di Maastricht, Hulanda. Riba potret por mira Jan cu e hobennan den e tayer di Jazz. Diasabra dia 19 di augustus lo cuminsa e tayer di Musica Popular, cual lo tuma lugar na school di Musica, Rufo Wever, den e edificio di Cas di Cultura. Pa participacion por tuma contacto cu Joan Hart na Cas di Cultura. RIBA TATTOO TIN AMBIENTE SIGURA ANTO CU “FEVER”, “GENIE” Y “YOUTH BOYZ” ORANJESTAD (AAN): E organizadornan ta warda publico, Diasabra awor riba Tattoo cu un otro gran evento riba lama, amantenan di bon fiesta awor e style di trip ta riba lama y keremi esun aki tambe ta na caminda pa un sold out!! Asina ta paga bon tino, yama pa haci bo reservacion na tempo, pasobra nos tin entendi cu ja caba tin bastante reservacion y bo mes sa busca bo pasashi tempran pa bo no mester perde e cruise party aki pa Diasabra awor mes. Ademas di tin e banda “Fever” e anochi aki tambe lo bay tey e genionan di tur tempo esta “Megateca Genie” y esey no ta tur, a bin acerca e famoso “Youth Boyz”cu lo bay duna un presentacion master pa tur nan fans, boso a waknan na Sparkling Tour? Awel bin wak baila y goza riba e dushi ritmo di reggaeton di Youth Boyz. Corda cu lo bay tin premio Cash!!! Pa esun cu baila mihor riba e cancion “Pasame la botella”,Soul to Soul ta laga tur esakinan pa un prijs atractivo. Ta Yega bo tin cu Yega, Si abo tambe ta un amante di un bon trip of fiesta anto ta riba Tattoo mes bo mester ta Diasabra awor y naturalmente romantico tur na blanco bisti nos ta bay. E fiesta ta cuminza 7:30 p.m. DIADOMINGO AWOR TIRSO STEBA LO LANZA SU C.D. TITULA “POR FIN” ORANJESTAD (AAN): Diadomingo awor Augustus 20 2006, e bolerista di tur tempo esta Tirso Steba lo bay lanza su disco compacto cu 10 fabuloso y romantico bolero na “Flor de Oriente”. Desde 3’or di atardi ”Etty Toppenberg y su ritmo candente di Flor de Oriente” lo deleita tur presente cu su musica fabuloso di semper. 4.00 ‘or di atardi lo bay tin e lanzamento di e C.D. y conhunto “Amigonan di Semper” lo deleita tur presente cu bon musica ambientoso y lo acompaña Tirso den diferente Bolero. Despues di e lanzamento di e C.D., Etty lo sigui deleita un y tur te den oranan laat di atardi. Un y tur ta keda cordialmente invita. CONSULADO DI COLOMBIA TA ANUNCIA CURSONAN VIRTUAL OTORGA PA “SENA” ORANJESTAD (AAN) -- Atravez di un comunicado di prensa, Mayor General Ricardo Emilio Cifuentes Ordoñez, Consul di Republica di Colombia na Aruba, tin e siguiente informacion pa su conciudadanonan residente. E programa di e Presidencia “Colombia nos une”, atravez di e “Servicio Nacional di Aprendizaje” (SENA), ta ofrece capacitacion virtual via internet na e ciudadanonan residente den exterior. E programa “Formacion en Ambientes Virtuales de Aprendizaje” cu SENA ta ofrece, ta conta cu 220 curso gratuito cu duracion di entre 20 pa 40 ora, 1200 tutor disponible pa atende e proceso, certificacion manda via coreo electronico ora e curso ta worde aproba, y cursonan completamente virtual desaroya via internet den e siguiente areanan: - “Arte, cultura, esparcimiento y deporte - Ciencias Naturales aplicadas - Ciencias sociales, educativas, religiosas y servicios gubernamentales - Explotacion primaria y extractiva - Finanzas y administracion - Operacion de equipo industrial y de transporte y oficios universales - Procesamiento, fabricacion y ensamble - Salud - Tecnologias de informacion”. Pa tin acceso na e servicio aki mester ingresa na pagina www.senavirtual.edu.co
|
||||||||||
|
|
||||||||||||
|
||||||||||||
