|
|
|
|||||||||||
|
 |
Aruba a para bira un lugar unda bo no por ta bo mes mas. Bo no tin derecho mas pa expresa bo mes, pa duna bo opinion, pa vocifera bo sentimento of pa haci un declaracion den corte. Parce cu pa tur esaki bo mester di un mandato di e Gobierno di terorisador cu kier silencia e pueblo aki. Nan a logra cu hopi hende, pero den e caso di Ruben Croes, nan a dal nan dede. Nos, yiunan di defunto Buchi Everaldo Croes no a wordo lanta bou un regimen di miedo. Nos a wordo lanta pa nos mayornan pa ta hendenan liber, sin compleho di inferioridad y cu norma y balornan halto. Nos a wordo lanta di chikito pa forma nos propio opinion y pa vocifera esaki tambe. Nos opinion, forma democraticamente, a wordo semper balora pa nos mayornan. Y esaki den un epoca unda mucha mester a “pishi bai drumi”. Nos ruman Ruben a cumpli grandemente cu su formacion di cas na momento cu el a sali na defensa di un prohimo. Nos tata lo ta orguyoso di dje awe. E mesun Ruben Croes, Booshi, kende a rescata bo no menos cu TRES biaha for di boca di tribon ora lama a bira blou y salo pa bo. Ultimo biaha cu bo a hera wak Pietje de Dood riba lama, ta e mesun RUBEN CROES cu bo ta laga desacredita aworaki, ta e prome persona cu a sali pa busca bo den su avioneta PRIVA sin busca drechi y sin tene cuenta cu bo ta un contrincante politico. Si nos ruman tabata di e mesun calidad di hende cu bo, awe lo bo ni tabata tey pa djodjo como minister y terorisa e pueblo Arubiano. Wel Booshi, akinan bo careda di bina a para. Abo, un falsificador di diploma, un delito pa cual den paisnan democratico bo ta sinta un castigo di prison di un cantidad di aña y ta keda sin ningun credibilidad y sigur no por ta ministeriabel, ta tribi yama mi ruman pa mentiroso. Cu Ruben lo a purba di influencia huez? Kisas esun cu no a sentencia bo pa falsifica diploma tabata influencia. Mi ruman Ruben a haci uso di su derecho sagrado di libertad di expresion cu ta hancra den nos constitucion, remember Booshi? – of bo no tin conocemento di nos derechonan constitucional? Henter Aruba conoce Ruben como un homber drechi, un persona cu curason grandi cu ta cla pa yuda unda cu e por. Na Hospital Ruben ta un trahado ehemplar cu 28 aña di servicio kende ni un dia a falta trabou. Ruben tin mas cu 150 dia di vakantie aden y e no sa mes con hamas lo e por tuma nan, asina e ta stima su trabou. Ruben ta e fundador di e evento acuatico mas grandi di mundo, cu a pone Aruba riba mapa, esta Aruba Hi-Winds, e ta co-fundador di Aruba Search & Rescue Foundation, e ta voorzitter di Rampenbestrijding, e ta e unico boluntario di Edmund Harms Foundation. Tur esaki e ta haci den su tempo liber, pa su prohimo, pa un amigo y mayoria bes...pa un desconoci. Nunca Ruben no ta pidi nada bek. Esaki ta nos ruman. Awe e ta haya un carta denigrante di bo muchanan manda den Regentenraad, na unda nan ta kere cu nan por bai pon’e na su luga. Literalmente tin para den e carta: “hij zal hierover intern worden aangesproken”, comosifuera Ruben ta un delincuente cu mester wordo colga na garot’i berguensa. (schandpaal) Aparte di tira pinda pa nos, bo por sigui duna e pueblo pan y circo haciendo chwercha di bo contrincantenan publicamente. Por ta di e forma aki bo por sasia bo hamber pa tin e pueblo den bo gara y poder absoluto y calma bo sed sadomasoquista. Pero Booshi, corda e dicho aki: tur porco tin su diasabra. Yolanda Croes Ruman mayor di Ruben Croes |
||||||||||
|
|
||||||||||||
|
||||||||||||
